Ղեկին բջջային հեռախոս օգտագործելը Մեծ Բրիտանիայում կպատժվի 200 ֆունտ (248 դոլար) տուգանքով, իսկ որոշ դեպքերում կարող է դառնալ հիմք՝ վարորդական իրավունքից զրկելու համար։ Ճանապարհային երթևեկության նոր կանոնները, որոնք նախատեսում են մեքենա վարելիս հեռախոսով խոսելու և տեքստային հաղորդագրություններ ուղարկելու համար պատժի զգալի խստացում, ուժի մեջ են մտնում մարտի 1-ից։ Այս մասին հայտնում է AP գործակալությունը։
Բրիտանական ոստիկանությունն առաջիկա շաբաթը կուժեղացնի պարեկությունը ճանապարհներին՝ օրենքը խախտող վարորդներին ի հայտ բերելու նպատակով։ Իշխանությունները նաև հատուկ թեժ գիծ են բացել, որով զանգահարելով կարելի է անանուն հայտնել վարորդների կողմից թույլ տրվող խախտումների մասին։
Ղեկին բջջային հեռախոսի օգտագործման արգելքն առաջին անգամ սկսել է գործել Մեծ Բրիտանիայում 2003 թվականին, տուգանքն այդ ժամանակ կազմել է 37 դոլար։
