Google ընկերության տնօրենների խորհրդի նախագահ Էրիկ Շմիդտը և Facebook սոցիալական ցանցի հիմնադիր Մարկ Ցուկերբերգը «Մեծ ութնյակի» գագաթնաժողովի նախօրեին կայացած ինտերնետ ֆորումի ժամանակ կոչ են արել այդ հավաքին մասնակցող երկրների ղեկավարներին չխստացնել այդ ոլորտի օրենսդրությունը, քանի որ դա կարող է միայն վնաս տալ դրա զարգացմանը: Այս մասին հաղորդում է Reuters գործակալությունը:
«Մարդիկ հավանություն են տալիս այն դերին, որը Facebook-ը կատարել է արաբական հեղափոխությունների ժամանակ, սակայն մտահոգություն ունեն, որ սոցիալական ցանցը հնարավորություն է տալիս տեղեկություններ հավաքել և տարածել դրանք: Սակայն մեկն առանց մյուսի անհնար է: Չի կարելի առանձնացնել ինտերնետի այն ասպեկտները, որոնք ձեզ դուր են գալիս, իսկ մնացած ամեն ինչ խիստ կարգավորել»,- ասել է Ցուկերբերգը:
«Տեխնոլոգիաները զարգանում են ավելի արագ, քան կառավարությունները, այդ պատճառով պետք չէ օրենքներն ընդունել ավելի վաղ, քան հնարավոր կլինի հասկանալ դրանց հետևանքները»,- ավելացրել է Շմիդտը:
Հիշեցնենք, որ ֆրանսիական Դովիլում ընթացող «Մեծ ութնյակի» այսօր մեկնարկած գագաթնաժողովի ժամանակ ինտերնետի խնդիրները լինելու են առանցքայինների շարքում:
