Հայաստանի ներքաղաքական առկա իրավիճակի շուրջ «Առաջին լրատվական»- ի հետ զրույցում, անդրադառնալով հարցին՝ ՀՀԿ-ն լքողների թիվը գնալով ավելանում է, արդյո՞ք ՀՀԿ-ն ներսից ճաքեր է տալիս, և հնարավո՞ր է ֆորսմաժորային իրավիճակ ստեղծվի, ԱԺ «Ժառանգություն» խմբակցության պատգամավոր Թևան Պողոսյանը նշեց. «Կասկածում եմ, որ ֆորսմաժորային իրավիճակներ կլինեն, որովհետև մեր շատ կուսակցություններ հիմնված են եղել անձերի վրա, ոչ թե արժեքների կամ գաղափարախոսության: Վստահ եմ, որ ցանկացած կուսակցությունում կան անձեր, որոնք ունեն գաղափարախոսություն, բայց նրանք, ովեքեր կուսակցությունն օգտագործել են որպես տրամպլին՝ պաշտոններ ունենալու կամ պետական հիերարխիայի մեջ որևէ դիրք զբաղեցնելու համար, եթե արդեն իրենց հաշվարկներով կորցնում են այդ դիրքերը, այս պահին լքում են կուսակցությունը»:
Կուսակցություններից հեռացողները քաղաքական պատճառներ իրենց հայտարարություններում չեն նշել: Թ. Պողոսյանն անդրադառնալով այս դիտարկմանը՝ նշեց. «Կարող է մարդն ասել՝ չնայած անհամաձայնություն ունեմ, բայց չեմ ցանկանում այդ մասին հրապարակայնացնել, բայց կարելի է բացատրել, թե որևէ բան փոխվել է արժեքների՞ մեջ, թե՞ ինքն այդ կուսակցությանը միացել էր, որովհետև դա մի խումբ անձանց խնդիր էր, այնտեղ իրեն լավ էր զգում, հիմա այդ մի խումբ մարդիկ իրեն չեն ընդունում, և ինքը հեռանում է:
Ցավոք մեր կուսակցությունները հիմնված չեն եղել արժեքային կամ գաղափարական մոտեցումների վրա: Նույնիսկ հիմնադիրները մեկ-մեկ այնպիսի քայլեր կարող են անել, որ զարմանք կառաջացնեն: Կլինեն նախընտրական ծրագրեր, այդ ժամանակ նոր կարելի է գնահատականներ տալ»:
Հարցին՝ կա՞ քաղաքական ուժ, որը գալիս է համակարգափոխության, Թ. Պողոսյանը պատասխանեց. «Այո՛, «Ելք»-ը այդ մտադրությունն ունի: Չեմ զարմանա, որ վաղը ՀՀԿ-ի ծրագիրը նույնպես համակարգային փոփոխության մասին լինի, մեկ է՝ իրենք սովոր են գրել, բայց կյանքի չկոչել»:
Մանրամասները՝ տեսանյութում: