«Առաջին լրատվական»- ի զրուցակիցն է «Համախմբում» կուսակցության վարչության անդամ Կարեն Անդրեասյանը:
-Պարոն Անդրեասյան, դուք երեկ գրառում էիք կատարել Ձեր ֆեյսբուքյան էջում՝ նշելով որ Ձեզ համար անընդունելի է, որ դաշինքի ցուցակը գլխավորի պաշտպանության նախկին նախարար Սեյրան Օհանյանը: Կխնդրեմ մանրամասնել, թե ինչու է անընդունելի:
-Ինձ համար անընդունելի է, որովհետև ես կարծում եմ, որ Սեյրան Օհանյանը դեռ պետք է անցնի քաղաքական քավարանի ճանապարհով, քանի որ բոլոր այն մարդիկ, ովքեր եղել են իշխանության մեջ, այդ թվում նաև ես, եթե իշխանության մեջ իրենց լավ են դրսևորել, նույնիսկ եթե, ինչպես իմ դեպքում, ընդդիմություն են եղել իշխանության մեջ, միևնույն է, մենք բոլորս ունենք քավարանով անցնելու խնդիր:
-Ո՞ր քավարանի մասին է խոսքը, մասնավորապես Սեյրան Օհանյանի մասով նշվում է Մարտի 1-ը, քառօրյա պատերազմը…
-Բոլոր մեղադրանքներով պետք է անցնել քավարանով՝ սկսած իրավական քավարանից, որովհետև եթե, օրինակ, լինի հակաօրինական գործողությունների մասին մեղադրանք, եթե լինի քաղաքական մեղադրանք, ամեն դեպքում մարդը պետք է պաշտոնից հետո ժամանակ տա հասարակությանը, որպեսզի հասարակությունը հասկանա, թե որքանով է վստահում այդ մարդու այժմ արդեն հեղափոխական կամ իշխանափոխական նկրտումներին:
-Սեյրան Օհանյանի՝ դաշինքը գլխավորելու հետ կապված հայտարարությունն արել էր «Համախմբում» կուսակցության նախագահ Վարդան Օսկանյանը, հետաքրքիր է՝ կուսակցության ներսում քննարկում եղե՞լ էր, Ձեր գրառումն անելուց առաջ արդյո՞ք Դուք տեղեկացրել եք վարչության մյուս անդամներին, որ համակարծիք չեք այս հարցում:
-Մի քանի անգամ քննարկում եղել է, ես առաջին իսկ քննարկման ժամանակ ասել եմ, որ ես ունեմ կոնկրետ վերապահում և մտահոգություն, և հետո կրկնել եմ այդ մասին: Սա առաջին անգամը չէ, նոր չէ, որ քննարկվում է, սա գործընթաց է, իսկ անմիջապես պարոն Օսկանյանի կողմից այդ մասին հրապարակային հնչեցնելուց հետո ինձ մոտ առաջացավ ցանկություն՝ հրապարակային ասելու, որ ես համաձայն չեմ:
–Պարոն Անդրեասյան, Ձեր գրառման մեջ նշել էիք նաև, որ Ձեզ համար անընդունելի է աշխարհաքաղաքական տարբեր մոտեցումներ ունեցող կուսակցությունների համախմբումը, այս դեպքում, երբ, օրինակ, Պարույր Հայրիկյանն է միացել ձեր դաշինքին, ի՞նչ սկզբունքով է դա տեղի ունեցել:
-Դուք շատ լավ օրինակ բերեցիք, ես՝ ինքս չեմ պատկերացնում, թե ինչպես է ռուսատյաց գործիչը համագործակցելու, օրինակ, Արամ Գ. Սարգսյանի հետ: Չեմ պատկերացնում, թե մենք ինչպես ենք աշխատելու պրոռուսական գործիչների հետ, երբ ես ունեմ արևմտյան արժեհամակարգ, իմ աշխարհաքաղաքական կողմնորոշումը սա է՝ արևմտյան արժեքներով պետություն կառուցենք Հայաստանում՝ պահպանելով լավագույն հարաբերությունները Ռուսաստանի հետ: Սա էր մեր կուսակցության վարչության շատ անդամների դիրքորոշումը, դրա համար մենք այնտեղ ընդհանրություն ունենք, իսկ երբ որ այդ ընդհանրությունը հանուն մեծ գաղափարի՝ իշխանափոխության, սկսում է շեղվել, գոնե պետք է հստակ լինի, թե ում գիծն է լինելու առաջնային հաղթանակի դեպքում:
-Կա՞ այդպիսի գիծ ձեզ մոտ:
-Անհանգստացած եմ, որ մենք կորցնում ենք գիծը:
-Պարոն Անդրեասյան, այդ դեպքում ինչո՞վ է պայմանավորված ամեն գնով դաշինքներ կազմելու ցանկությունը:
-Ես դեմ չեմ, որ տարբեր մարդիկ գան և իրենց տեղը զբաղեցնեն մեր համախմբման շուրջ, գերնպատակը մեկն է՝ իշխանափոխություն: Ընդ որում՝ այսօր ճանապարհները մի քանիսն են, ես կարող եմ միայն ասել, որ իշխանափոխությունը երազանք է բոլորիս համար, բայց ինքնանպատակ չէ. չի կարելի ուզել իշխանափոխություն, որ գնալ գլորվել ավելի վատ ձոր: Չնայած թվում է, որ սրանից ավելի վատ չի կարող լինել, բայց միշտ լինում է ավելի վատ: Այնպես որ չի կարելի մի օր ավել դիմանալ ՀՀԿ այսօրվա վերնախավի այս զավթողական, կարելի է ասել թալանչի կառավարմանը, բայց միևնույն ժամանակ չի կարելի կրակից ելնել, ընկնել ջուրը կամ հակառակը: Պետք է երազանքը չփոշիացնես և ինքդ քո ձեռքով չդարձնես անարժեք:
–Իսկ ինչո՞ւ են ձեր կուսակցության ներկայացուցիչներն այդպես վարվում, ի՞նչ եք կարծում:
-Իմ կուսակցության ներկայացուցիչները վատ բանի համար չէ, որ ուզում են լուծումներ գտնել, ես իրենց չեմ մեղադրում, նույնիսկ հասկանում եմ առանձին դեպքերում: Մեր վարչությունում կա երկու թև, իմ թևն ավելի փոքր է, մի մասն ուզում է պրագմատիկ քայլերի հերթականություն, այսինքն՝ օր առաջ հնարավորինս ռեալիստական իշխանափոխություն անել, իսկ մեր թևն ուզում է իշխանափոխություն անել, բայց պահպանելով քաղաքական ռոմանտիզմի կամ միգուցե քաղաքական հետագծի տարրերը, մեր երկու թևերի միջև հիմա ոչ թե բախում, այլ քաղաքական բանավեճ կա: Ես կողմ եմ, որ մենք այսօր համագործակցենք Զարուհի Փոստանջյանի, «Ժառանգություն» և ԳԱԼԱ կուսակցությունների հետ, «Հիմնադիր խորհրդարանի», Ալեք Ենիգոմշյանի հետ, ես այդպես եմ տեսնում համախմբումը, որին կարող են միանալ և ապաշխարել բազմաթիվ այլ ուժեր:
-Հիմնականում այնպիսի գործիչների անուններ նշեցիք, որոնք արևմտյան արժեհամակարգի կողմնակից են: Հնարավո՞ր է, որ եթե կոնսենսուս չստացվի, ապա դուրս գաք կուսակցությունից:
-Չեմ ուզում ավարտված համարել 6-7 ամսվա քաղաքական ուղին, որն անցել եմ պարկեշտ և լավ մարդկանց հետ: Այլ հարց է, որ դեռ տարաձայնություններ կան, ուզում եմ հրապարակային բանավեճով իմ կողմը քաշել այն մարդկանց, ովքեր տատանվում են կամ ի սկզբանե ուզեցել են նման գործընկերություն: Մենք պետք է գտնենք ճիշտ ուղղությունը:
-Կա տեսակետ, որ և՛ Ս. Օհանյանը, և՛ Վ. Դալլաքյանը, և՛ Հովիկ Աբրահամյանը, ով երեկ հայտարարեց ՀՀԿ-ից դուրս գալու մասին, պաշտոնանկությունից հետո տեղավորվում են ընդդիմության շարքերում և փորձում են ստեծել կեղծ ընդդիմություն: Մտավախություն չկա՞, որ կեղծ ընդդիմության մասը կկազմեք, եթե այսպես շարունակեք:
-Նախ՝ իշխանականները, երբ որ դուրս են գալիս իշխանությունից, շատ հնարավոր է, որ շատ անկեղծ նեղացել են և դարձել են ոչ թե կեղծ, այլ շատ էլ անկեղծ ընդդիմություն: Եվ ի վերջո բոլորս հեղափոխություն ենք ուզում, հեղափոխությունը կարող է լինել օլիգարխիկ կամ ժողովրդական, ես երազում եմ ժողովրդական հեղափոխության մասին, որին կաջակցեն մեղանչող, ապաշխարող օլիգարխները:
-Նախքան մեղանչելը չպե՞տք է արդյոք պատասխանատվություն կրեն նախկինում գործած սխալների համար:
-Ես դրա համար եմ ասում՝ քաղաքական և իրավական քավարանով պիտի անցնեն՝ ով ինչի արժանի է:
-Մասնավորապես Սեյրան Օհանյանի մասով ի՞նչ կասեք՝ ապրիլյան քառօրյա դեպքերի հետ կապված:
-Կարծում եմ ապրիլյան պատերազմի հետ կապված, պարոն Օհանյանն ունի քաղաքական քավարանով անցնելու խնդիր, չեմ կարծում, որ նա հանցագործություն է կատարել՝ կոնկրետ այդ խնդիրների հետ կապված: Մենք սպասում ենք բացատրությունների, ես գիտեմ, որ պարոն Օհանյանն ունի բացատրություններ, արդարացումներ, թե ինչու են եղել սխալներ, այնտեղ կան լուրջ մեղավոր մարդիկ, որոնց անունները նա կտա կամ չի տա: Հարցն այն է, որ ես չպետք է կազմակերպեմ այդ գործընթացը պարոն Օհանյանի համար: Ես ինքս պետք է գտնեմ այն մարդկանց, որոնց հետ ինքս պետք է անցնեմ քավարանով: Ես չպետք է քավարանով անցկացնեմ ուրիշներին: Այնպես որ թող ամեն մեկը մտածի իր մեղքերի, իր գործած սխալների մասին, գտնի քաղաքական մաքրություն պահպանած գործիչներին, կանգնի նրանց կողքին, մաքրվի և անի այն, ինչի մասին երազել է այս երկրի համար:
-Վարդան Օսկանյանի հետ համագործակցության մասով այս դեպքում չկա՞ խնդիր:
– Ութ տարի է, այդ մարդն անցնում է քաղաքական քավարանով՝ անկախ իր գործած ու չգործած մեղքերից: Իրավական քավարանի մասով՝ նույնիսկ նրա ամենամեծ թշնամիները անգամ փոքր կոռուպցիոն բան չկարողացան գտնել կամ սարքել: Իսկ քաղաքական քավարանով բոլորս ենք անցնում:
Հարցազրույցն ամբողջությամբ՝ տեսանյութում:
