«Առաջին լրատվական»– ի զրուցակիցն է «Ժառանգություն» կուսակցության փոխնախագահ Արմեն Մարտիրոսյանը:
-Պարոն Մարտիրոսյան, այսօր տեղի ունեցավ «Ժառանգություն» կուսակցության վարչության նիստը: Ի՞նչ քննարկվեց փակ նիստում, արդյո՞ք օրակարգում դրված էր առաջիկա խորհրդարանական ընտրություններին միասնական, տարբեր քաղաքական ուժերի հետ դաշինքով մասնակցելու հարցը, թե՞ ոչ:
-Իհարկե, ակնհայտ է, որ այդ հարցն էր այսօր դրված, բնականաբար մենք պետք է քննարկեինք, թե այս պահին ինչ իրավիճակ է, որոշում կայացնելու խնդիր չկար այսօր, ընդամենը փուլային քննարկում էր, որովհետև վերջին ժամանակահատվածում ակտիվ շփումներ են եղել, և պետք է շարունակվեն այդ շփումները, դրա համար նախ որոշակի ինֆորմացիա տվեցինք վարչության անդամներին, լսեցինք նրանց կարծիքները: Շփումներ կան տարբեր հարթություններում, տարբեր խմբերի, տարբեր անձանց հետ, և վարչության անդամների կարծիքը շատ կարևոր էր:
-Ե՞րբ որոշում կկայացվի, կուսակցությունում կան տարաձայնություններ՝ առաջիկա խորհրդարանական ընտրություններին մասնակցելու ձևաչափի հետ կապված:
-Տարաձայնություն չկա, կա տարակարծություն և դա շատ լավ է, հենց այդպես էլ պետք է լինի: Տարակարծությունը ոչ միայն վերաբերում է մասնակցության ձևաչափին, այլ նաև նրան, թե ում հետ կարելի է համագործակցել, ում հետ՝ ոչ: Ակնհայտ է մի բան, որ մեր կուսակցականների և վարչության համար գլխավոր խնդիրն այն է, որ ոչ թե «Ժառանգության» կուսացական հարցը լուծվի, այլ երկրում ծառացած խնդիրները լուծվեն: Այս իրավիճակի փոփոխության խնդիր կա, և դա կարող է տեղի ունենալ, եթե մենք համագործակցենք այլոց հետ: Խնդիրն այս մասին է, կուսակցականները ևս մեկ անգամ հաստատեցին իրենց այդ մոտեցումը, որ մենք շարժվում ենք համապետական խնդիրներ լուծելու ուղղությամբ: Մեզ համար դաշինքը միջոց է երկրի առջև ծառացած խնդիրները լուծելու համար:
-Կուսակցությունում կա նաև տարակարծություն, թե որ կուսակցության հետ գնալ ընտրությունների, մի մասը պատկերացնում է Գ. Ծառուկյանի գլխավորությամբ դաշինքի հետ մասնակցությունը, մյուս մասը՝ ՕՀանյան-Օսկանյան դաշինքի հետ համագործակցության ձևաչափով է պատկերացնում: Այս տեսակ խմորումնե՞ր էլ կան:
-Մեր կուսակցության ճնշող մեծամասնությունը լայն դաշինքի կողմնակից է, որի մեջ կլինեն նաև ձեր նշած անձինք և ոչ միայն նրանք, նաև «Ելքը», այլ միավորներ ևս, ՀԱԿ-ը՝ անկախ նրանից, որ Լևոն Տեր-Պետրոսյանի վերջին ելույթը մեզ համար ընդունելի չէ: Լայն դաշինք չստեղծվելու մասին ևս կուսակցությունում տարբեր մոտեցումներ կային:
Հարցազրույցն ամբողջությամբ՝ տեսանյութում:
