Օրերս ԵԱՀԿ Մինսկի խմբի համանախագահները հայտարարություն էին տարածել Տավուշի մարզում Ամանորից առաջ տեղի ունեցածի հետ կապված, այս հայտարարությունը հասցեական չէր, ավելին՝ կոչ էր արվում վերադարձնել ադրբեջանցի զինծառայողի դիակը: Այս արձագանքներն արդյո՞ք մեր սխալ դիվանագիտության հետևանքն են: Անդրադառնալով այս հարցին «Առաջին լրատվական»– ի հետ զրույցում ՄԱՀՀԻ փորձագետ Գևորգ Մելիքյանը նշեց. «Խնդրահարույց է այն, թե ինչու հայկական կողմը այս հայտարարությունը և դրանից առաջ եղած այլ հայտարություններ, որոնք վերաբերում են հայ-ադրբեջանական սահմանին տեղի ունեցած միջադեպերին, քննարկում է ԼՂՀ հակամարտության համատեքստում: Սա երկու պետությունների սահմանի խախտման դեպք է, և այս խնդիրը պետք է բարձրացվի ոչ թե ԼՂՀ հակամարտության համատեքստում և բանակացությունների շրջանակում, այլ որպես սահմանի խախտման դեպք:
Եվ շատ կարևոր է, որ Հայաստանի արտգործնախարարը խոսի ոչ թե հետաքննման մեխանիզմների մասին, չէ՞ որ այդ պայմանավորվածությունները ձեռք են բերլվել ԼՂՀ-ի և ոչ թե Հայաստանի և Ադրբեջանի սահմաների վերաբերյալ, հետևաբար առնվազն տարօրինակ է, որ Էդվարդ Նալբանդյանը խոսում է այդ մեխանիզմների մասին:
ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը հայտարարեց, որ խնդիրն այն է, որ հասցեական չեն այդ հայտարարությունները: Մի՞թե խնդիրը դա է: Խնդիրն այն է, որ խախտվել է Հայաստանի պետական սահմանը: Սա միջպետական խնդիր է: Այս տեսանկյունից պետք է դիտարկվի այս հարցը»:
Գևորգ Մելիքյանը նաև նշեց, որ ՀԱՊԿ-ը որպես կառույց ճաքեր է տալիս, ըստ էության, այն որպես պաշտպանական կառույց երբեք կայացած չի եղել և այդպիսի հարց երբևէ չի դրվել: Նրա խոսքով՝ Հայաստանը փոխանակ իր պահանջները ներկայացնելու, Ադրբեջանի քայլերն է սրբագրում:
«Հայաստանը անրաժեշտություն ունի լրջորեն վերանայելու իր արտաքին քաղաքականությունը: Հայաստանը վարում է ծայրաստիճան զգուշավոր քաղաքականություն»,- նշեց Գ. Մելիքյանը:
Մանրամասները՝ տեսանյութում:
