Վրաստանի պաշտպանության նախարար Իրակլի Ալասանիան օգոստոսի 19-ին պաշտոնական այցով մեկնում է ԱՄՆ: Ինչպես հաղորդում է Trend գործակալությունը՝ վկայակոչելով նախարարի հայտարարությունը, սա Վրաստանի պաշտպանության նախարարի առաջին այցն է ԱՄՆ վերջին 4 տարիների ընթացքում:
«Ինձ հրավիրել է իմ ամերիկացի գործընկերը Բրյուսելում հանդիպման ընթացքում, որտեղ ես մասնակցել եմ ՆԱՏՕ-ի պաշտպանության նախարարների հանդիպմանը»,- ասել է Ալասանիան:
Նա ընդգծել է, որ ամերիկյան կողմը հաստատել է ռազմական ոլորտում համագործակցությունը խորացնելու պատրաստակամությունը:
«ԱՄՆ-ը օգնություն կտարամադրի Վրաստանին ռազմական ուժերի նախապատրաստման գործում, և ոչ միայն արտասահմանում գործողություն անցկացնելու, այլ նաև Վրաստանի պաշտպանունակությունը ուժեղացնելու համար»,- ընդգծել է նախարարը:
Ալասանիան իր գոհունակությունն է հայտնել ռազմական ոլորտում Վրաստանի և ԱՄՆ-ի ներկայիս հարաբերություններից:
