Հռոմի պապ Ֆրանցիսկոսը խստորեն քննադատել է «ֆունդամենտալիստական ահաբեկչությունը» և կրոնական, քաղաքական առաջնորդներին կոչ է արել ներդրում ունենալ «մահաբեր այս խելահեղության» դեմ։
«Մենք գիտենք, որ այսօր էլ կրոնը երբեմն կարող է օգտագործվել որպես պատրվակ բռնության համար։ Առաջին հերթին ի նկատի ունեմ ֆունդամենտալիստական ահաբեկչւթյունը, որն անցած տարի դարձել է հազարավոր զոհերի պատճառ ամբողջ աշխարհում»,-ասել է Հռոմի պապը։
Խոսելով հանցագործությունների մասին՝ Ֆրանցիսկոսն առանձնացրել է Նիգերիայի իրադարձությունները, որտեղ ահաբեկիչներն իրենց նպատակների համար օգտագործել են երեխաների, Կահիրեի ղպտիական եկեղեցում տեղի ուենցած ահաբեկչությունը, Ստամբուլը, որտեղ մարդիկ զոհվել են Նոր տարվա տոնակատարության ժամանակ, եվրոպական մի շարք երկրներում տեղի ունեցած հարձակումները, որոնց զոհ են դարձել անմեղ քաղաքացիներ։
«Ես դիմում եմ կրոնական բոլոր իշխանություններին, որպեսզի վերջիններս միասնական կերպով հաստատեն, որ չի կարելի սպանել հանուն Աստծու։ Ֆունդամենտալիստական ահաբեկչությունը սուր հոգևոր չքավորության հետևանք է, ինչի հետ հաճախ կապված է նաև սոցիալական չքավորությունը»,-ասել է պոնտիֆիկը։
