Իրանի դեմ ամերիկյան պատժամիջոցների երկարաձգումը չի ազդի միջուկային համաձայնագրի վրա։ Միացյալ Նահանգները նախկինի պես հակված է համաձայնագրով ձեռք բերված պայմանավորվածությունները կատարելուն։ Ինչպես հաղորդում է TASS գործակալությունը, այս մասին ասվում է ԱՄՆ պետքարտուղար Ջոն Քերիի հայտարարության մեջ։
«Իրանի դեմ պատժամիջոցների մասին օրենքի երկարաձգումը որևէ կերպ չի ազդի երկրի դեմ պատժամիջոցային ռեժիմի թուլացման վրա և չի խոչընդոտի կոմերցիոն ընկերություններին գործարքներ իրականացնել իրանական կողմի հետ»,-հտակեցրել է Ջոն Քերին։
Նա նաև նշել է, որ ԱՄՆ վարչակազմը նախկինի պես կունենա անհրաժեշտ լիազորությունները՝ պատժամիջոցները հետագայում չեղարկելու համար, եթե Իրանը կատարի միջուկային համաձայնագրով ստանձնած պարտավորվածությունները։ «Իրանի հետ միջուկային համաձայնագիրը շարունակում է մնալ Միացյալ Նահանգների, նրա դաշնակիցների և գործընկերների կարևոր ռազմավարական նպատակը»,-ասվում է Քերիի հայտարարության մեջ։
Հիշեցնենք, որ ԱՄՆ-ը 10 տարով երկարաձգել է Իրանի դեմ պատժամիջոցների մասին օրենքը։
