Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին ուկրաինական հեռուստաալիքներից մեկի եթերում հայտարարել է, որ չի պատրաստվում երրորդ անգամ մասնակցել նախագահական ընտրություններին՝ ընդգծելով, որ Վրաստանի Սահմանադրության համաձայն, դա անհնար է։
Լրագրողը նրան հիշեցրել է, որ Պուտինը պատրաստվում է երրորդ անգամ մասնակցել նախագահական ընտրություններին, ինչին ի պատասխան Սաակաշվիլին՝ ասել է. «Բազմաթիվ պատճառներով ես չեմ կարող Պուտին դառնալ: Վրաստանն այլ երկիր է, այստեղ իրավիճակն այլ է: Իմ շրջապատում չի քննարկվում այդ հարցը: Մենք հստակ գիտենք, որ մեզ համար առավել կարևոր է այն, թե ինչ տեղի կունենա 6 ամիս անց, 1, 2, 3.5-4 տարի անց»:
Հիշեցնենք, որ առավել վաղ Վրաստանի նախկին նախագահ էդուարդ Շևարդնաձեն հայտարարել էր. «Եթե Սաակաշվիլին ցանկանում է երրորդ անգամ մնալ նախագահի պաշտոնում, նա պետք է թափանցիկ ընտրություններ անցկացնի:
Նա արդեն երկու անգամ մասնակցել է նախագահական ընտրություններին, սակայն կարող է փոխել օրենքը և երրորդ անգամ մասնակցել դրանց: Ես չեմ բացառում, որ իրադարձությունները կարող են ընթանալ հենց այդպիսի սցենարով:
Սաակաշվիլին դեռևս արժանի չէ բռնապետ կոչվելուն, բայց եթե երկար ժամանակ մնա իր ներկայիս պաշտոնին, ապա նրա մոտ կարող են ի հայտ գալ բռնապետական հակումներ»: