Գյումրիում վարչապետ Կարեն Կարապետյանը, խոսելով համայնքների զարգացման մասին, նշեց, որ համայնքապետերը պետք է կոնկրետ ծրագրեր ներկայացնեն համայնքները ոտքի կանգնեցնելու, զարգացնելու համար: Ըստ էության, համայնքների զարգացման բեռը դրվում է համայնքների ղեկավարների վրա և երբ նրանց ներկայացրած ծրագիրը հավանության կարժանանա, հավանաբար այդ դեպքում պետական մակարդակով աջակցություն կլինի:
Անդրադառնալով այս դիտարկմանը՝ «Առաջին լրատվական»- ի հետ զրույցում Հայաստանի համայնքների միության նախագահ Էմին Երիցյանը նշեց. «Չեմ կարծում, որ մոտեցումն այնպիսին է, որ համայնքների վրա է դրվում համայնքի զարգացման խնդիրների ամբողջական պատասխանատվությունը: Այս պահին կառավարությունն ակնկալում է, որ համայնքներից նախաձեռնություններ լինեն: Սակայն այստեղ նրբություն կա. համայքները, որպես վարչական մարմին, իրավասու չեն բիզնես ծրագրեր ներկայացնելու, դա ուղղակի հակասում է իրենց գործունեությանը, որովհետև դա կհակասի ազատ մրցակցության սկզբունքին:
Համայնքների զարգացումը ավելի լայն հասկացություն է. պետք է տեղական իշխանությունը ձևավորի, մշակի և բնակչությանը ներկայացնի համայնքի զարգացման տեսլականը: Մեր համայնքները դեռևս սահմանափակ վարչական մարմիններ են, պետությունը երբ որ մեթոդական ուղղորդումներ է տալիս զարգացման ծրագրերին, սահմանափակվում է ֆորմալ մոտեցումներով, այնինչ զարգացման ծրագիրը պետք է լայն լինի: Օրենսդրությամբ նույնպես սահմանափակումներ են դրված, որոշակի ընթացակարգեր են սահմաված: Շատ համայնքերի ծրագրեր դեռևս խորհրդային տարիների ավանդության վրա են հիմնված»:
Մանրամասները՝ տեսանյութում:
