Թուրքիայի իշխանությունները Բեյրութում երկու թուրք օդաչուների առևանգումից հետո կոչ են անում իրենց քաղաքացիներին լքել Լիբանանը և հնարավորության դեպքում խուսափել այցելել այս երկիր, գրում է РИА Новости-ն՝ հղում կատարելով լիբանանյան Daily Star հրատարակչությանը:
Ուրբաթ օրը թուրքական Turkish Airlines ավիաընկերության երկու օդաչուներ՝ երկուսն էլ Թուրքիայի քաղաքացիներ, անհայտ անձանց կողմից առևանգվել են ավտոբուսով հյուրանոց ուղևորվելիս: Մի շարք ԶԼՄ-ների տվյալներով՝ հարձակմանը վեց մարդ է մասնակցել: Նրանք տեղաշարժվել են ամենագնացներով և KIA մակնիշի ավտոմեքենայով:
Ավիաընկերությանը պատկանող ավտոբուսում 9 ուղևորներ և վարորդն են եղել, վերջինիս էլ ոստիկանությունը դեպքի կապակցությամբ հարցաքննել է: Առևանգման պատասխանատվությունն իր վրա է վերցրել նախկինում անհայտ «Զուվար Ալ-Ռիդա» կազմակերպությունը:
Թուրքական կողմը հուսով է, որ Լիբանանի իշխանությունները «հնարավոր բոլոր միջոցները կձեռնարկեն Թուրքիայի քաղաքացիների անվտանգությունը Լիբանանում ապահովելու համար»:
Ավելի վաղ ենթադրվում էր, որ առևանգումը կարող է կապված լինել 2012 թ. տեղի ունեցած դեպքի հետ, երբ Սիրիայում 9 լիբանանցի ուխտավորներ էին առևանգվել: Այն ժամանակ նրանց ընտանիքները Թուրքիային խնդրել էին միջամտել և աջակցել իրենց հարազատների անվնաս ազատ արձակմանը: Տեղեկացվում է, որ վերջին ամիսներին առևանգվածների հարազատները բազմիցս բողոքի ակցիաներ են անցկացրել Turkish Airlines-ի շտաբ-գրասենյակի մոտ: Նրանք թուրքական կողմին մեղադրել են սիրիացի ապստամբների հետ բանակցությունների ձգձգման մեջ:
Թուրք օդաչուների առևանգումից հետո ուխտավորների հարազատներն ու երկրի շիաների համայնքը հայտարարել են, որ դրա հետ ոչ մի կապ չունեն:
