Այս շաբաթ իրանական լրատվամիջոցները կրկին տարածեցին տեղեկություն Իրանի նախագահ Հասան Ռոհանիի՝ Հայաստան կատարելիք այցի մասին, որը, այնուամենայնիվ, առանձնակի հստակություն չմտցրեց այցի ժամկետների հարցում:
Իրանական «ՖԱՐՍ» լրատվական գործակալությունը մի քանի օր առաջ գրել է, թե Ռոհանին առաջիկա շաբաթվա ընթացքում Հայաստանի նախագահ Սերժ Սարգսյանի հրավերով կայցելի Երևան, որից հետո կմեկնի Ղազախստան և Ղրղըզստան: Բայց մի քանի ժամ անց լրատվական կայքը խմբագրել է լուրը՝ «հաջորդ շաբաթ»-ի փոխարեն գրելով, որ Ռոհանին «շուտով» կայցելի Երևան: Թե ինչն էր սրա պատճառը, արդյոք սա տեխնիկական վրիպում էր, թե տեղեկատվական արտահոսք, յուրօրինակ մարտավարություն Իրանի նախագահի այցի շուրջ սպասումներ առաջացնելու նպատակով, դժվար է: Հիշենք նաև, որ իրանական կողմը դեռ սեպտեմբեր ամսից Իրանի դեսպանի, արտգործնախարարության ներկայացուցչի և լրատվամիջոցների միջոցով հայտարարում է, որ Հասան Ռոհանին շուտով լինելու է Հայաստանում:
Ամեն դեպքում հայ փորձագետների ընդհանուր տպավորությունն այն է, որ Իրանի նախագահը մինչև տարվա վերջ կլինի Երևանում:
Իրանագետ Էմմա Բեգիջանյանը կարևորում է Իրանի նախագահի առաջիկա այցը Հայաստան, բայց ավելացնում՝ այն հանգամանքը, որ Ռոհանին նախագահ ընտրվելուց ավելի քան երեք տարի անց պիտի գա Հայաստան, այնքան էլ չի համապատասխանում հայ-իրանական բարեկամական հարաբերությունների ոգուն:
«Ընդհանուր առմամբ, սա դրական քայլ է, անպայման արծարծվելու են տնտեսական ծրագրեր, որոնք արժանի են երկկողմ հետաքրքրության, անգամ կարծում եմ՝ կարող է քննարկվել երկաթուղու հարցը: Բոլոր դեպքերում, կարծում եմ՝ անպայման կգա, որովհետև մինչ այդ էլ էին այդ մասին խոսել: Գուցե դա լինի երկու շաբաթ անց, գուցե դեկտեմբերին, բայց ինձ թվում է՝ մինչև 2017 թ. նա հաստատ Հայաստան կայցելի»,- «Առաջին լրատվական»-ի հետ զրույցում նշեց Էմմա Բեգիջանյանը:
Մեր զրուցակցի կարծիքով՝ կայանալիք հայ-իրանական բանակցություններում կքննարկվեն բոլոր կարևոր հարցերը, այդ թվում՝ Հյուսիս-Հարավ տրանսպորտային նախագծի, հայ-իրանական երկաթուղու, էներգետիկ համագործակցության հարցերը, հնարավոր է՝ նաև Հայաստանում իրանական ներդրումների հարցը, ինչպես նաև ղարաբաղյան հիմնախնդրի կարգավորումը:
Ըստ փորձագետի՝ Ռոհանիի այցը հետաքրքիր է թե՛ իրանական և թե՛ հայկական կողմերի համար՝ հատկապես միջազգային և տարածաշրջանային վերջին զարգացումների համապատկերում:
Ի դեպ, Միացյալ Նահանգների նախագահական ընտրությունները որոշակի անհանգստություն և մտավախություններ, իհարկե, առաջացրել են Իրանում այն պատճառով, որ ընտրված թեկնածուն իր քարոզարշավի ընթացքում բազմիցս քննադատել է Իրանի հետ ստորագրված միջուկային համաձայնագիրը և սահմանված պատժամիջոցները վերացնելու որոշումը: Էմմա Բեգիջանյանը, սակայն, քիչ հավանական է համարում նմանատիպ զարգացումը՝ հիշեցնելով, որ, նախ, համաձայնագիրը ոչ թե երկկողմ է, այլ բազմակողմ՝ ստորագրված մի կողմից ՄԱԿ-ի Անվտանգության խորհրդի 5 մշտական անդամների և Գերմանիայի, մյուս կողմից՝ Իրանի միջև:
«Կոնգրեսում Հանրապետականի նախագահն այսօր հայտարարել է, որ Թրամփն այդպիսի բան չպիտի ասեր, պարզապես պետք է ավելի շատ մեծացնել Իրանի նկատմամբ վերահսկողությունը համաձայնագիրը իրականացնելու հարցում: Եթե ԱՄՆ-ն դուրս գա պայմանագրից, ավելի շուտ ԱՄՆ-ն կմեկուսանա, քան թե Իրանը: Սա միջազգային համաձայնագիր է, ինչ-որ երկիր կարող է դուրս գալ միջազգային համաձայնագրից, բայց դա չի նշանակում, որ այն չեղյալ է համարվելու: Իրանցի մի տնտեսագետ վերջերս ասել էր, որ Թրամփի օրոք Իրանը կարող է տնտեսական վնաս կրել կարճաժամկետ ժամանակահատվածում, բայց ավելի լավ է՝ Թրամփն ընտրվի, քան Քլինթոնը: Ու մի բան էլ ասեմ, որ Իրանի դեմ բոլոր սահմանափակումները պատմության ընթացքում կիրառվել են դեմոկրատների ժամանակ, մասնավորապես՝ 1953 թ. Իրանի դեմ հեղաշրջումը, 1963 թ. շահի բարեփոխումները»:
