Արդեն մի քանի օր է՝ հանրության ուշադրության կենտրոնում է օգոստոսի 3-ին Երուսաղեմի հայոց պատրիարք Նուրհան արքեպիսկոպոս Մանուկյանի՝ Ն.Օ.Տ.Տ. Ամենայն հայոց կաթողիկոս Գարեգին Բ-ին ուղղված նամակը, որտեղ պատրիարքը տարակուսանք էր հայտնել Հայ առաքելական եկեղեցու Ֆրանսիայի թեմի առաջնորդ Նորվան արքեպիսկոպոս Զաքարյանի հրաժարականի վերաբերյալ Գերագույն հոգևոր խորհրդի հաղորդագրության կապակցությամբ: Նա նաև նամակում նշում է՝ տարիներ անց համոզվել է, որ վեհափառ հայրապետին ավելի հետաքրքրում են արտաքինն ու նյութականը: Նուրհան սրբազանը նաև մտահոգություն է հայտնում, որ ավելի շատ կարիք կա մաքրակրոն և զարգացած եկեղեցականների, քան գարշապար լիզողների:
Ավելի ուշ Մայր Աթոռ Սուրբ Էջմիածնի տեղեկատվական համակարգի ղեկավար Տեր Վահրամ քահանա Մելիքյանը տարակուսանք էր հայտնել, որ այն Արիս արքեպիսկոպոս Շիրվանյանի անձնական էլեկտրոնային հասցեից է ուղարկված: Հիշեցնենք, որ պատրիարքի ընտրությունների ժամանակ մրցակցությունը Նուրհան արքեպիսկոպոս Մանուկյանի և այն ժամանակ Երուսաղեմի հայոց պատրիարքի տեղապահ Արիս արքեպիսկոպոս Շիրվանյանի միջև ավարտվեց ձայների չնչին տարբերությամբ՝ հօգուտ Նուրհան արքեպիսկոպոս Մանուկյանի:
«Առաջին լրատվական»-ի հետ զրույցում Արիս արքեպիսկոպոս Շիրվանյանը նշեց, որ իր ուղարկած նամակը վավերական է՝ պատրիարքի ստորագրությամբ և պատրիարքարանի պաշտոնաթղթի վրա:
«Բովանդակությունը նույնն է, այն, ինչ նախապես մամուլով տարածվեց: Իհարկե, չգիտեմ, թե ինչպես անկանոն կերպով դուրս եկավ և տարածվեց՝ մինչ վեհափառին ուղարկելը, բայց ես՝ տեսնելով, որ արդեն աղմուկ է բարձրացել, և Տեր Վահրամը կասկած է հայտնել մամուլում նամակի վավերականության առնչությամբ, անմիջապես ինձ մոտ եղող պաշտոնագիրը ուղարկեցի Մայր աթոռ՝ մտածելով, որ երևի պատրիարքի կողմից ուղարկվածը չէր հասել»,- ասաց Արիս սրբազանը: Նա նշեց, որ երեկ երեկոյան է ուղարկել:
Հարցին՝ Դուք կիսո՞ւմ եք արդյոք պատրիարքի՝ Ֆրանսիայի թեմի առաջնորդ Նորվան արքեպիսկոպոս Զաքարյանի հրաժարականի վերաբերյալ Գերագույն հոգևոր խորհրդի հաղորդագրության կապակցությամբ մտահոգությունները, Արիս սրբազանը ասաց. «Թույլ տվեք չմեկնաբանեմ»:
