ԵՊՀ Աստվածաբանության ֆակուլտետի դոցենտ Վարդան Խաչատրյանը լրագրողների հետ հանդիպմանը անդրադառնալով գենդերային հավասարության մասին օրենքին՝ առանձնացրեց «ձեռք բերովի սոցիալապես ամրագրված վարք» դրույթը: «Չփորձեն մարդիկ արդարանալ, որ սա ի նկատի չեն ունեցել, միևնույն ժամանակ մենք պետք է հասկանանք՝ եթե օրենքում միջազգային օրենքների գերակայությունը կա, ապա այդ օրենքների փաթեթը պետք է դրվի սեղանին»,- ասաց Վարդան Խաչատրյանը:
Թե ինչ է պատրաստվում անել եկեղեցին, Սբ. Սարգիս եկեղեցու հովիվ տեր Գրիգորը նշեց, որ եկեղեցու հիմնական առաքելությունը հասարակության դաստիարակությունն է քարոզչության միջոցով. «Սա մեղքի ոլորտում է, արդյունքը Սոդոմ-Գոմորի գլխին եկածն է: Մենք այս պղծությունը ուզում ենք օրինականացնել, և, բնականաբար, բոլոր հնարավոր և անհնար միջոցներով պետք է պայքարել, անգամ նահատակվել, քան թե արժանանալ Աստծո պատժին»,- ասաց նա:
Ինչո՞ւ է դրվել «գենդեր» եզրույթը. ըստ նրա՝ սա մարդկանց համար հատուկ պատրաստված խճողում է: «Աստված արարեց տղամարդ և կին և նպատակ դրեց, որ աճեն, բազմանան և արարեն»,- ասաց տեր Գրիգորը: Նրան զարմացրել էր երեկ Ֆրանսիայում մի կնոջ հայտարարությունը, թե պատրաստ է կերակրել միասեռ ընտանիքներին, որոնք երեխաներ են որդեգրում:
Ըստ նրա` միանշանակ սա մեզ հարիր չէ և ուղղված է ընտանիքի դեմ, մինչդեռ ընտանիքն ամենապարզ բջիջն է, որտեղ մարդը իրեն պետք է երջանիկ զգա. «Ամեն ինչ սկսվում է ընտանիքից, և չարի ու սատանայի սլաքները ուղղված են այստեղ: Մենք պետք է մեր հասարակության մեջ ընտանիքի գաղափարն ամուր դնենք»,- ասաց նա:
Հարցին՝ իսկ ինչո՞ւ են մեր պատգամավորները կողմ քվեարկել, տեր Գրիգորը պատասխանեց. «Դուք չգիտե՞ք` ովքեր են մեր պատգամավորները, ՀՀԿ-ն ասել է, որ մի օրենք պետք է ընդունեն, նրանք էլ սեղմել են կոճակը: Նրանցից շատ քչերն են շահագրգիռ այդ օրենքի ընդունմամբ, մի մասն էլ խորամուխ չեն եղել և չեն հասկացել»,- ասաց նա:
«Եկեղեցին չի կարող չշարունակել պայքարը, քանի որ սա մեղք է, յոթ մահացու մեղքերից մեկը: Եթե որկրամոլությունը մահացու մեղք է, այլասերվածությունը մեղք չէ՞»,- ասաց նա:
Համահայկական ծնողական կոմիտե նախաձեռնության համակարգող Արման Բոշյանը բացատրեց, թե ինչ է գենդերը. գենդերը մարդու իրավունքն է` փոխելու սեփական սեռական վարքը: Նրա խոսքով՝ պատահական չէ, որ գենդերային օրենքները որդեգրած երկրները հետևողական կերպով օրինականացնում են մանկապիղծների ընկերակցությունները:
«Արհեստական պատվաստը բերել են մեր երկիր, որը չի ապրի: Սա արել են, որ մեր երկիրը չաճի, չբարգավաճի»,- ասաց հրապարակախոս Լիա Ավետիսյանը:
«Ինչ մնացել է ազգային արժեհամակարգից՝ անվանել եք կարծրատիպ, հիմա վերջին կարծրատիպն էլ ընտանիքն է, եկեք կոտրենք՝ վերջանա»,- ասաց նա:
