BBC-ի փոխանցմամբ՝ Վաշինգտոնում գտնվող Սպիտակ տանը տեղի է ունենում նոյեմբերի 8-ին ԱՄՆ-ում անցկացված նախագահական ընտրություններում հաղթած հանրապետական Դոնալդ Թրամփի ու գործող նախագահ Բարաք Օբամայի հանդիպումը։
Նախօրեին Օբաման հայտարարել էր, որ իր մոտ է հրավիրել նախագահական մրցավազքը շահած Դոնալդ Թրամփին, որպեսզի քննարկի իշխանության հանձնման հարցերը։
Սպիտակ տան մամլո քարտուղար Ջոշ Էռնեստը հայտարարել է, որ Օբամայի ու Թրամփի հանդիպումը խոստումնալից է թվում։ Թրամփն իր նախընտրական արշավի ժամանակ արել է մի շարք հայտարարություններ, որոնք արմատականորեն տարբերվում են Օբամայի վարած քաղաքականությունից։
Թրամփը մասնավորապես հայտարարել էր Ղրիմը ռուսական տարածք ճանաչելու հնարավորության մասին։ Բացի այդ, Թրամփն անհամաձայնություն էր հայտնել արտերկրի հակամարտություններին ու վարչակարգերի փոփոխմանն ԱՄՆ-ի միջամտելու քաղաքականությանը, ինչպես նաև քննադատել էր Օբամայի ներքին քաղաքականության հիմնական ուղղությունները, ինչը հատկապես վերաբերում է հարկահավաքության ու առողջապահության ոլորտներին։
