Գերմանական Welt պարբերականի փոխանցմամբ՝ Գերմանիան մտադիր էր Թուրքիայում իրականացնել 58 միլիոն եվրոյի ներդրում, սակայն Անկարան հրաժարվել է թույլ տալ Ինջիրլիքում Հյուսիսատլանտյան դաշինքի բազայի զարգացումը։
Բազայում աշխատանքները պետք է մեկնարկեին հունիսի վերջին, սակայն բազայի զարգացման մասին որոշումը ձգձգվեց քաղաքական հարցերի պատճառով, որոնք ծագել են Թուրքիայի և Գերմանիայի միջև։ Ինչպես հաղորդում է պարբերականը երկու երկրների հարաբերություններում լարվածությոն է առաջացել Բունդեսթագի կողմից Հայոց ցեղասպանության մասին բանաձևի ընդունումից հետո։
Բանաձևի ընդունումից հետո Անկարան գերմանացի խորհրդարանականներին երկար ժամանակ թույլ չէր տալիս այցելել բազա, ի պատասխան Բեռլինը սպառնացել էր հետ կանչել զինվորականներին։ Ներկայում բազայում գտնվում են ավելի քան 240 գերմանացի զինվորականներ։
Գերմանիան նախատեսում է շուրջ 25 միլիոն եվրո ծախսել հետախուզական օդանավերի համար օդանավակայան կառուցելու և զինվորականների համար բնակելի կոնտեյներներ գնելու նպատակով։ Եվս 30 միլիոն Գերմանիան մտադիր է տրամադրել հրամանատարական կետի կառուցման համար։
Ներկայում Բեռլինի և Անկարայի հարաբերություններում նոր սկանդալ է հասունանում։ Թուրքիայի նախագահ Ռեջեփ Թայիփ Էրդողանը խստորեն քննադատել է Գերմանիայի իշխանություններին՝ Ֆեթուլլահ Գյուլենի կազմակերպության անդամների հարցում բռնած դիրքորոշման համար։ Անկարայում ելույթներից մեկի ժամանակ նա ասել է, որ Գերմանիան ապաստան է տրամադրում ահաբեկիչներին։ Իսկ Գերմանիայի ԱԳ նախարար Ֆրանկ Վալտեր-Շտայնմայերը նախօրեին հայտարարել է, որ չի հասկանում Էրդողանի տրամաբանությունը։
