Սևանա լճի ստորջրյա չորրորդ ֆրանս-հայկական գիտարշավը կայացավ հուլիսի 19-29-ը: Գիտարշավի նպատակների ու արդյունքների մասին, վերացված անտառների տեղանքից հանված բույսերի և ջրի նմուշների հետազոտությունների մասին լրագրողների հետ քննարկում անցկացրին Սևանա լճի ստորջրյա ավազանի գիտահետազոտական արշավն իրականացնողները` ԳԱԱ հիդրոէկոլոգիա և ձկնաբանության ինստիտուտի տնօրեն Էվելինա Ղուկասյանը, Սևան ազգային պարկի փոխտնօրեն Վահե Գուլանյանը, Ստորջրյա հետազոտությունների և սուզումների հայկական կենտրոնի (ՍՀՍՀԿ) սուզորդ Ստեփան Կոջայանը (Ֆրանսիա):
Էվելինա Ղուկասյանն իր խոսքում նշեց, որ ամառը ձկների համար բազմացման շրջան է, վերջին շրջանում Սևանում հայտնվել է երկու տեսակի նոր ձուկ` մանր տառեխիկներ և չեբոչոկներ, որը նպաստավոր չէ, քանի որ մտավախություն կա, որ նրանք կարող են սնվել ավելի արժեքավոր ձկների ծկնկիթով: Դեռևս ապացուցված չէ, բայց գրականության մեջ չեբոչոկի վարքագծի մասին տվյալներն այդ են վկայում:
«Սևան» ազգային պարկի փոխտնօրեն Վահե Գուլանյանն ասաց, որ տարիներ շարունակ ջրի երեսից է կատարվել ուսումնասիրությունը, դրսից ուրիշ կերպ է, ներսից` ուրիշ կերպ: Հետազոտությունների առումով վաղ համարեց ինչ-որ բան ասել, նմուշները հետազոտության փուլում են:
Ստեփան Կոջայանի խոսքերով` իրենց նպատակներից մեկն այն է, որ տեղեկացնեն ժողովրդին ջրի լավ և վատ կողմերի հետ. ինչպես անել, որ Սևանի քաղցրահամ ջուրը մաքուր պահեն, լողալիս վտանգ չլինի: Ֆրանսահայ սուզորդն ասաց նաև, որ ուզում են վերապատրաստել, մարզել սուզորդներին, միայն թե լինի նաև գիտական մոտեցում:
«Նպատակը միշտ` ուր ջուր կա` սուզվենք ու հաճույք ստանանք, բայց քանի կա հնարավորություն, սուզվենք ու նկարահանումներ անենք, գիտնականներին տանք»,- ասաց Ստեփան Կոջայանը: Նա նշեց նաև, որ չափումներ են արել Լճաշենում, հետազոտությունների համար տիղմի, ջրի և բույսերի նմուշ են վերցրել: Հնագիտական գծով ծրագիր էլ ունեն: Սուզվել են նաև Գավառագետի հունը, չափումներ են արել, շարունակելու են հետազոտությունը, մտածում են, որ գուցե հնագիտական արժեք ունեցող նմուշներ գտնեն:
