Իրանական Tasnim լրատվական գործակալության փոխանցմամբ՝ Իրանի ԱԳՆ-ը «հնարովի պատմություն» է որակել ամերիկացի գեներալ Ջոզեֆ Վոտելի ենթադրությունն այն մասին, որ Իրանը մասնակցել է Եմենի մոտ ամերիկյան ռազմանավերի հրթիռակոծությանը։
Իրանի ԱԳՆ-ի պաշտոնական ներկայացուցիչ Բահրամ Ղասեմին հայտարարել է. «Կարմիր ծովում ԱՄՆ ռազմանավերի հրթիռակոծության մեջ Իրանի դերի մասին հայտարարելը հնարովի պատմություն է, որը արժանի չէ որևէ վստահության։
ԱՄՆ-ն ինքն է խրվել եմենյան պատերազմի ճահճում։ Նրանք ուղիղ և անուղղակի աջակցություն է ցուցաբերում (Սաուդյան Արաբիայի գլխավորած) միջազգային դաշինքին՝ այդպիսով նպաստելով Եմենում հանցանքների շարունակմանը»։
Նա ԱՄՆ-ին կոչ է արել դադարեցնել սաուդյան դաշինքի աջակցությունը և վերջ դնել Եմենում նրա դաշնակիցների գործած սպանություններին։
Ավելի վաղ ԱՄՆ զինված ուժերի Կենտրոնական հրամանատարության ղեկավար, գեներալ Ջոզեֆ Վոտելը հայտարարել է, որ Իրանը որևէ կերպ մասնակից է Եմենի ափերի մոտ ամերիկյան նավերի հրթիռակոծությանը. «Իրանը որոշակի դեր է խաղում այդ ամենում։ Ես իսկապես այդպես եմ կարծում»։
