Այսպես կոչված՝ իսլամական ոստիկանության ղեկավարը Մոսուլում խռովություն է բարձրացրել ԴԱԻՇ-ի առաջնորդ Աբու Բաքր ալ-Բաղդադիի դեմ: Այս մասին հայտնում է As Sumaria հեռուստաալիքը՝ հղում անելով Նայնավա նահանգում աղբյուրներին:
Հաղորդվում է, որ հեղաշրջումն առաջնորդում է մոսուլցի Աբու Ուսման մականունով անձ: Հայտնի է, որ ալ-Բաղդադին իրեն ենթարկվող էլիտար միավորումներին կոչ է արել դիմակայել հեղաշրջմանը և հրամայել է ոչնչացնել իսլամական ոստիկանության ղեկավարներին:
Աղբյուրները նշել են, որ քաղաքը քաոսային վիճակում է, խմբավորման թշնամի ռազմական ստորաբաժանումների միջև տեղի են ունենում բախումներ:
Հեռուստակայանի տեղեկությամբ՝ իսլամական ոստիկանության մեքենաներից մեկից բարձրախոսներով որոշ ժամանակ առաջ հայտարարվել է, որ ահաբեկիչների առաջնորդը փախել է սիրիական Ռաքքայի ուղղությամբ, իսկ նրա կինը ձերբակալված է: Բունտի հեղինակները հայտարարում են, որ «Մոսուլում ալ-Բաղդադիի իշխանությունն ավարտված է»:
