ԱՄՆ ներքին անվտանգության նախարարությունը և երկրի ազգային հետախուզական վարչությունը տարածել են համատեղ հայտարարություն, որում պաշտոնապես մեղադրել են ռուսական իշխանություններին ամերիկյան քաղաքական կառույցների վրա կիբերհարձակումների կազմակերպման համար: Այս մասին հաղորդում է BBC-ն։
Գերտեսչությունները հստակեցնում են, որ խոսքն ամերիկացի քաղաքական գործիչների էլեկտրոնային նամակագրությունների՝ DCLeaks և WikiLeaks կայքերում հրապարակման, ինչպես նաև Guccifer 2.0 կեղծանունով ցանցահենի գործունեության մասին է, որը պատասխանատվություն էր ստանձնել ԱՄՆ Դեմոկրատական կուսակցության սերվերների կոտրման համար։
«Հաշվի առնելով այդ հարձակումների մասշտաբն ու բարդությունը՝ մենք վստահ ենք, որ այդ գործողություններն արտոնել կարող էին միայն ռուս պետական բարձրաստիճան անձինք»,- ասվում է հայտարարության մեջ։ Գերատեսչություններում կիբերհարձակումների նպատակը համարվել է ընտրական գործընթացի վրա ազդելու փորձ։
Հայտարարության մեջ նշվում է, որ որոշ նահանգների ընտրական համակարգերը վաղուց ենթարկվել են «զոնդավորման» հասցեներից, որոնք կապված են եղել ռուսական ընկերության հետ։ Սակայն ձայների հաշվարկի վրա ազդել ոչ ոք չի կարող, նույնիսկ ազգային կառավարությունն իր ռեսուրսներով՝ ասվում է հայտարարության մեջ։
