Թուրքական Anadolu լրատվական գործակալության փոխանցմամբ՝ Պենտագոնում հերքել են ԴԱԻՇ-ի դեմ պայքարի գծով միջազգային կոալիցիայի ներկայացուցիչներից մեկի պնդումը, թե Իրաքում թուրք զինվորականների ներկայությունն անօրինական է։
Պենտագոնի մամլո քարտուղարր Մեթյու Ալենը լրատվամիջոցի հետ զրույցում հայտարարել է, որ գնդապետ Ջոն Դորիանը նման հայտարարություն չի արել Անկարայի հասցեին. «Գնդապետ Ջոն Դորիանին վերագրված խոսքերը մաքուր կեղծիք են։ Այդ լուրերը արտահայտությունների սխալ մեկնաբանությունների արդյունք են։
ԱՄՆ-ում վստահ են, որ Իրաքում թուրք զինվորականների ներկայության հարցը պետք է լինի Բաղդադի ու Անկարայի միջև դիվանագիտական քննարկումների առարկա»։
Ավելի վաղ հաղորդվել էր, որ Իրաքում գործող միջազգային կոալիցիայի խոսնակ, ամերիկացի գնդապետ Ջոն Դորիանը, մեկնաբանելով Իրաքի հյուսիսում թուրքական զորքի ներկայության պատճառով թուրք-իրաքյան հարաբերություններում ծագած լարվածությունը, հայտարարել էր, որ թուրքական բանակը Իրաքի տարածքում հայտնվել է առանց Իրաքի կառավարության պաշտոնական թույլտվության, և հետևաբար Իրաքի տարածքում թուրքական զորքի ներկայությունն անօրինական է:
