ՀՀՇ-ից, այնուհետև` Հայ ազգային կոնգրեսից հեռացած ԱԺ նախկին փոխխոսնակ Կարապետ Ռուբինյանն այսօր հայտարարեց «Առցանց ազատականների ալյանսի» հիմնադրման մասին: Նա նաև պատրաստվում է վաղը մասնակցել «Ժառանգություն» կուսակցության քաղաքացիական ժողովին և այնտեղ ելույթ ունենալ:
Ռուբինյանն ասաց, թե ինքը բազմիցս քննադատել է Հայ ազգային կոնգրեսին «լճացող պայքարի համար»: «Որովհետև բավական կորցրել էր սրությունն ու համարձակությունը»,- ասաց Ռուբինյանը և հավելեց. «Մեր համաժողովրդական պայքարը մինչև մարտի 1-ը բավական ռադիկալ և գրագետ քաղաքացիական անհնազանդության մեթոդներ էր կիրառում, անթերի պայքար էր իրականացնում… դա պիտի բերեր իշխանությունների հրաժարականին: Մենք օր առ օր տանուլ ենք տալիս մեր երկիրը, քանի որ այս ռեժիմի գոյատևումը կործանում է երկիրը»:
ԱԺ նախկին փոխնախագահը կարծիք հայտնեց, թե ներկա քաղաքական զարգացումների տրամաբանությունը բերում է նրան, որ, ի վերջո, հասնելու ենք ԱԺ հերթական ընտրությունների, «որտեղ թամադան էլի լինելու է Սերժ Սարգսյանը»,- ասաց նա: Ռուբինյանը սկզբունքորեն դեմ չէ Կոնգրես-իշխանություն երկխոսությանը: «Ես տեսնում եմ, որ այսպիսի զարգացումը, ինչքան էլ որ լավ է, որ մենք չենք ունենա քաղբանտարկյալներ, բայց հայտարարվում է, թե դա կլիցքաթափի իրավիճակը: Էապես լիցքաթափվող իրավիճակում ինչո՞ւ պետք է ռեժիմը սկսի բանակցել իր հրաժարականի մասին: Չեմ հասկանում»,- հայտարարեց նա և հավելեց. «Հեղափոխության մասին պետք է մոռանանք: Դրա համար առկա բոլոր գործոններն այլևս չկան, թերևս, միայն մնացել է սոցիալական իրավիճակի գործոնը»,- ասաց նա: