Ամերիկացի ֆինանսիստ Ջորջ Սորոսը 500 մլն դոլար կհատկացնի փախստականների օգնության համար: Այս մասին նա գրել է The Wall Street Journal-ի համար իր հոդվածում:
Սորոսը նշում է, որ ներգաղթյալներին ընդունող երկրների կառավարությունները չեն կարողացել մշակել փախստականների ինտեգրման արդյունավետ քաղաքականություն, ինչը հանգեցրել է անկայունության և մարդկային տառապանքների: Նրա կարծիքով՝ կառավարությունները պետք է առաջատար դեր խաղան միգրացիոն ճգնաժամի լուծման գործում, սակայն կարևոր է ներգրավել նաև մասնավոր ոլորտը:
Այսպես, ԱՄՆ նախագահ Բարաք Օբամայի վարչակազմը վերջերս ամերիկյան ընկերություններին կոչ է արել ավելի ակտիվ դեր խաղալ միգրացիոն խնդիրների լուծման գործում: Այդ կոչին ի պատասխան՝ Սորոսը որոշել է այդ նպատակով հատկացնել 500 մլն դոլար:
Սորոսը նշել է, որ սերտորեն կաշխատի ՄԱԿ-ի փախստականների հարցերով գերագույն հանձնակատարի և Փրկության միջազգային կոմիտեի հետ՝ կողմնորոշվելու համար ներդրման պայմանների հարցում, նաև հույս է հայտնել, որ իր օրինակով կոգեշնչի այլ ներդրողների:
