Արձագանքելով պատվաստանյութերի պետգնումներին «Տելիա-Մեդ» ՓԲԸ-ի մասնակցության մասին ԹԻՀԿ փորձագետ Արտակ Մանուկյանի հրապարակման վերաբերյալ ՀՀ առողջապահության նախարարության և «Տելիա-Մեդ» ՓԲԸ-ի հայտարարություններին ԹԻԱՀԿ-ն՝ սույնով տեղեկացնում է, որ մեր փորձագետի կողմից վերլուծությունը կատարելիս, որպես տեղեկատվության աղբյուր, հիմք է ընդունվել ՀՀ ֆինանսների նախարարության Պետական գնումների պաշտոնական ինտերնետային կայքը:
Հավաստիության կանխավարկածից ելնելով՝ ակնկալվում է, որ պետական բոլոր մարմինների հրապարակային պաշտոնական տեղեկատվությունն ամբողջական է և ստույգ, հետևաբար, ոչ լիարժեք տեղեկատվության պարագայում անհիմն է փորձագետին կամ կազմակերպությանը մեղադրել հանրությանը մոլորության մեջ գցելու համար: Պետական գնումների պաշտոնական ինտերնետային կայքում տեղադրված են շրջանակային համաձայնագրով պայմանագրերի հիման վրա պետության կարիքների համար կատարված գնումների մասին ամսական հաշվետվություններ, որտեղ առկա է տեղեկատվություն, ըստ որի պետության կողմից «Տելիա-Մեդ» ՓԲԸ-ի հանդեպ 2015թ նոյեմբերին ձևավորվել է 65.4 մլն դրամի պարտավորություն, 2016թ. հունվարին 1046.2 մլն դրամի պարտավորություն, 2016թ. փետրվարին՝ 84 մլն դրամի պարտավորություն, իսկ 2016թ. մարտին՝ 85.8 մլն դրամի պարտավորություն (ընդամենը՝ 1281.4 մլն դրամի պարտավորություն) և առկա չէ այդ պայմանագրերի՝ ուժի մեջ չմտնելու մասին որևէ նշում, ինչից կարելի է եզրակացնել, որ նշված պետ.գնումներն իրականացվել են պայմանագրերի համաձայն:
Վերոգրյալի հիման վրա, կոչ ենք անում ՀՀ առողջապահության նախարարությունը՝ մեղադրանքներ ներկայացնելուց առաջ անդրադառնալ պետական մարմինների պաշտոնական ոչ լիարժեք տեղեկատվության հրապարակման պատճառներին և հրապարակվող տեղեկատվության ձևաչափին, ապահովել ժամանակին տեղեկատվության փոխանակումն միմյանց միջև և պաշտոնական կայքերում հրապարակել միայն ամբողջական ու հավաստի տեղեկություններ:
Լուսանկարը՝ Photolure-ի
