Հուլիսի 15-ին ՀՀ ԱԺ նախագահ Հովիկ Աբրահամյանն ընդունել է ԵԱՀԿ գործող նախագահ, Ուկրաինայի արտաքին գործերի նախարար Լեոնիդ Կոժարային:Այս մասին «Առաջին լրատվական»-ին հայտնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:
Ողջունելով հյուրին` ԱԺ նախագահը կարևոր է համարել ԵԱՀԿ գործող նախագահի այցը Հարավային Կովկասի երկրներ և նշել է, որ այն լավ հնարավորություն է տարածաշրջանի խնդիրներին տեղում ծանոթանալու, ինչպես նաև ընդհանուր հետաքրքրություն ներկայացնող հարցեր քննարկելու համար: Նա համոզմունք է հայտնել, որ ԵԱՀԿ-ում Ուկրաինայի նախագահության ժամանակահատվածում կձեռնարկվեն տարածաշրջանում խաղաղ գոյակցության և հակամարտությունների խաղաղ կարգավորման անհրաժեշտ քայլեր: ԱԺ նախագահի խոսքով` Հայաստանը բարձր է գնահատում ԵԱՀԿ կառույցների հետ համագործակցությունը և կազմակերպության աջակցությունը մեր երկրում ընթացող ժողովրդավարական բարեփոխումներին: Հովիկ Աբրահամյանը նշել է, որ ՀՀ Ազգային ժողովը կարևորում է ԵԱՀԿ երևանյան գրասենյակի հետ արդյունավետ համագործակցությունը:
Անդրադառնալով տարածաշրջանային խնդիրներին` ԱԺ նախագահը բարձր է գնահատել ԵԱՀԿ-ի Մինսկի խմբի համանախագահների` ղարաբաղյան հակամարտության խաղաղ կարգավորմանն ուղղված ջանքերը: «Ուզում եմ հատկապես ընդգծել, որ ի տարբերություն Ադրբեջանի, որն անընդհատ փորձեր է ձեռնարկում հակամարտության կարգավորման հարցը տեղափոխել միջազգային այլ կազմակերպություններ և հանդես է գալիս ԵԱՀԿ Մինսկի խմբի ձևաչափի փոփոխությամբ, Հայաստանը անշեղորեն պաշտպանել և շարունակում է պաշտպանել բանակցային ներկայիս ձևաչափը՝ որպես հակամարտության կարգավորման միակ և գործուն ձևաչափ», – ասել է ԱԺ նախագահը: Նրա խոսքով` Հայաստանը պահպանում է տարածաշրջանային համագործակցության սկզբունքները հնարավոր բոլոր ոլորտներում, խորացնում վստահության ամրապնդման միջոցները և մշտապես կողմ է եղել լիարժեք և փոխշահավետ տարածաշրջանային տնտեսական համագործակցությանը՝ այն դիտարկելով որպես փախվստահության մթնոլորտի ստեղծման կարևոր նախադրյալ:
Հովիկ Աբրահամյանը բարձր է գնահատել հայ-ուկրաինական միջպետական հարաբերությունների բարձր մակարդակը և կարևորել միջխորհրդարանական կապերի խորացումը, համագործակցությունը միջազգային կառույցներում, ինչպես նաև փոխգործակցության զարգացումը տնտեսության, գիտության, կրթության և այլ ոլորտներում:
Շնորհակալություն հայտնելով ընդունելության համար` ԵԱՀԿ գործող նախագահ Լեոնիդ Կոժարան բարձր է գնահատել Հայաստան-ԵԱՀԿ համագործակցությունը և Հայաստանի ակտիվ ներգարվվածությունը կազմակերպության առջև ծառացած խնդիրների լուծման գործում: Ուկրաինայի արտգործնախարարը կարևորել է Հայաստանի և Ուկրաինայի միջև քաղաքական, տնտեսական կապերի, միջխորհրդարանական հարաբերությունների շարունակական զարգացումն ու ամրապնդումը:
Կարևորելով տարածաշրջանի անվտանգությունը և խաղաղությունը` Իվան Կոժարան այս համատեքստում նշել է, որ ԼՂ հիմնախնդիրը պետք է կարգավորվի բացառապես խաղաղ բանակցությունների միջոցով և շեշտել, որ ԵԱՀԿ-ն աջակցում է Մինսկի խմբի գործունեությանը: Հիմնախնդրի կարգավորման հարցում նա անհրաժեշտ է համարել նաև հասարակությունների միջև շփումների ակտիվացումը, որի ուղղությամբ Ուկրաինան, որպես նախագահող երկիր, մտադիր է ձեռնարկել մի շարք քայլեր:
Անդրադառնալով Եվրոպայում սովորական սպառազինությունների վերահսկման խնդրին` կողմերը կարևորել են Պայմանագրի շուրջ բանակցությունների վերսկսումը:
Հանդիպմանը քննարկվել են երկուստեք հետաքրքրություն ներկայացնող այլ հարցեր ևս:
