Եվրագոտու ֆինանսների նախարարները («Եվրախումբ»), բացի Պորտուգալիային 78 մլրդ եվրո օգնություն ցուցաբերելու մասին որոշումից, նաև հաստատել են Եվրոպական կենտրոնական բանկի նոր նախագահին: Ինչպես և ակնկալվում էր, այդ պաշտոնը զբաղեցնելու է Իտալիայի կենտրոնական բանկի նախագահ Մարիո Դրագին: Այս մասին հաղորդում է Reuters գործակալությունը:
Անհրաժեշտ է, որ այսօր նրա թեկնածությունը հաստատի Եվրամիության անդամ երկրների էկոնոմիկայի և ֆինանսների նախարարների խորհուրդը («Էկոֆինը»), որից հետո Դրագին կներկայանա Եվրախորհրդարան` թեկնածությունը հաստատելու համար:
Բացի այդ, Դրագիին հավանություն պետք է տան Եվրամիության անդամ երկրների ղեկավարները, իսկ այս երկար գործընթացը կավարտվի «Եվրախմբի» և «Էկոֆինի» համատեղ նիստի ժամանակ:
Հիշեցնենք, որ Դրագին այս պաշտոնում փոխարինելու է ֆրանսիացի Ժան Կլոդ Տրիշեին, որին ժամկետն ավարտվում է 2011 թ. հոկտեմբերին: Ենթադրվում է, որ վերջնական որոշումը կայացվելու է հուլիս ամսին: Եվրոպական կենտրոնական բանկի ղեկավարն ընտրվում է 8 տարով:
