«Ոսկե Ծիրան» 10-րդ միջազգային կինոփառատոնի «Երևանյան պրեմիերաներ» արտամրցութային ծրագրում այսօր կցուցադրվի Մարգարետե ֆոն Թրոթայի «Հաննաարդենտ» ֆիլմը: 61-ամյա գերմանացի կինոռեժիսորը Հայաստանում է: Նա խաղացել է շուրջ 30 ֆիլմերում և նկարել մոտ 25 ֆիլմ: Լրագրողների հետ հանդիպմանը ռեժիսորը նշեց, որ 60-70-ականներին Գերմանիայում իրենք նոր կինոգործիչների երիտասարդ սերունդն էին համարվում, մինչդեռ հիմա ամենատարեցն են:«Բայց դեմքիս չնայեք, դա չի նշանակում, որ ներքուստ տարեց ենք»,- ասաց Մարգարեթե ֆոն Թրոթան, ով հատկապես տպավորված է «Ոսկե Ծիրան» փառատոնի բացմամբ, որը նրան հիշեցրել է իր մուտքը կինո:
Նա նշեց, որ իր հաջորդ ֆիլմը կապված է լինելու անձնական պատմության հետ և լինելու է երկու քույրերի մասին. «Ես չեմ ուզում դառնալ ռեժիսոր, որը միայն պատմական ֆիլմեր է նկարում: Ես ուզում եմ նկարել ֆիլմ, որտեղ ցույց կտամ, որ կինը ուժեղ է»,- ասաց ռեժիսորը՝ հավելելով, որ նախկինում էլ այդպիսի ֆիլմեր նկարահանել է:
Մարգարեթե ֆոն Թրոթան ասաց, որ ինքը ֆեմինիստ է, բայց դա չի նշանակում, որ տղամարդկանց պետք է սպանել:
Նա անդրադարձավ նաև կինոկրթությանը՝ նշելով, որ ինքը որևէ տեղ չի սովորել, որովհետև այն ժամանակ շատ աղքատ է եղել: Նշեց, որ իր աշխատանքում կարևոր գործոն է եղել շատ ֆիլմեր դիտելը: «Պետք է սովորել աշխատելով»,- ասաց նա հավելելով, որ դա է եղել դերասան, ապա նոր ռեժիսոր դառնալու պատճառը: «60-ականներին ես նոր ալիքով ոգեշնչված էի, բայց այն ժամանակ Գերմանիայում անհնար էր պատկերացնել, որ կինը կարող է ֆիլմ նկարել։ Դրա համար նախ դերասանի դպրոցն անցա, բայց ցանկությունն ի սկզբանե ռեժիսոր դառնալն էր, դերասանուհի լինելը միջոց էր ռեժիսոր դառնալու»,– ասաց նա:
80-ականներին, երբ ռեժիսորը սկսել է իր առաջին ֆիլմերը նկարել, դրանից հետո մեկ անգամ է նկարահանվել՝ Զանուսի «Կապտամորուսը» ֆիլմում։
Նրա ֆիլմերից են Կատարինա Բլումի «Անարգված պատիվը», «Քույրեր կամ երջանկության հաշվեկշիռ», Վախ և սեր», «Վերադարձ», Քույրը», «Սիրո համար երբեք» և այլն:
Անդրադառնալով Կատարինա Բլումի «Անարգված պատիվը» ֆիլմին՝ նա նշեց, որ Բլումի ժամանակներն անցել են, դրանք հատուկ բուլվարային ժամանակներ էին և այդ ամսագրի լրագրողին հաստատ կսպանեին։ «Բայց դա չի նշանակում որ բոլոր լրագրողները վատն են, և նրանց պետք է սպանել, բայց բոլոր կինոքննադատներին ես հաստատ կսպանեի»,-կատակեց ռեժիսորը: Նա նշեց, որ կինոն սկսվում է հենց առաջին կադրից: Հենց առաջին կադրն է ճանապարհ գցում ֆիլմի համար, դրա համար, նրա խոսքով, երբեք չի կարելի ֆիլմ դիտելու ուշացած գնալ:
Լուսանկարը՝ PanARMENIAN Photo-ի
