Թուրքական T24 առցանց թերթի փոխանցմամբ՝ Թուրքիայի նախագահ Ռեջեփ Էրդողանը տետ-ա-տետ հանդիպում է ունեցել Ղազախստանի նախագահ Նուրսուլթան Նազարբաևի հետ, ով վերջին անգամ Թուրքիա էր այցելել 4 ամիս առաջ:
Ավելի ուշ հանդիպումը շարունակվել է պատվիրակությունների մասնակցությամբ, ինչից հետո կազմակերպվել է համատեղ մամուլի ասուլիս: Իր ելույթում Էրդողանը նշել է, որ Նազարբաևը դարձավ հուլիսի 15-ին երկրում իրականացված ռազմական հեղաշրջման փորձից հետո Թուրքիա այցելած օտար պետության առաջին ղեկավարը:
«Հուլիսի 15-ի գիշերը մենք վերապրեցինք քաղաքական պատմության ամենաարյունալի դավաճանություններից մեկը: Ռազմական հանդերձանքով ահաբեկիչները Փենսիլվանիայից (Գյուլեն) ստացած հրամանով դուրս եկան ազգի դեմ, դավաճանեցին նրան:
Հեղաշրջման փորձն ի ցույց դրեց ֆեթուլահական կազմակերպության նենգ դեմքը: Այս կազմակերպությունը դավաճանել է նաև (նախկին նախագահներ) Թուրգութ Օզալին ու Սուլեյման Դեմիրելին»,- ասել է Թուրքիայի նախագահը:
Էրդողանն ընդգծել է, որ Նազարբաևի այցը Թուրքիայի համար նման ժամանակներում վկայում է բարեկամության մասին՝ հավելելով, որ երկու երկրները շարունակելու են ջանքեր գործադրել՝ ապրանքաշրջանառության ծավալը հասցնելու համար 10 միլիարդ դոլարի:
