«Առաջին լրատվական»-ի տեղեկություններով՝ Սյունիքի արդեն նախկին մարզպետ Սուրիկ Խաչատրյանը Գորիսի շրջանն ընդգրկող թիվ 38 ընտրատարածքում մեծամասնական ընտրակարգով չի առաջադրվելու որպես պատգամավորի թեկնածու: Այդ ընտրատարածքը թափուր կմնա, քանի որ, ինչպես արդեն հայտնի է, այդտեղից պատգամավոր դարձած Հանրապետական կուսակցության անդամ Վահե Հակոբյանը նախագահ Սերժ Սարգսյանի որոշմամբ Ս. Խաչատրյանի փոխարեն շուտով կնշանակվի Սյունիքի մարզպետ:
Հիշեցնենք, որ մոտ մեկ ամիս առաջ իր տան մոտ իր հարազատների կողմից կատարված սպանությունից հետո Ս. Խաչատրյանը հրաժարական ներկայացրեց: Այդ օրերին տեղեկություններ էին շրջանառվում, որ նա անպաշտոն չի մնա և Սյունիքի մարզից մեծամասնական ընտրակարգով կդառնա պատգամավոր: Այն ժամանակ նաև կարծիքներ էին շրջանառվում, թե հրաժարական կտա Սյունիքի մարզի Գորիսի և Սիսիանի շրջաններն ընդգրկող թիվ 37 ընտրատարածքից մեծամասնական ընտրակարգով պատգամավոր դարձած Հայկ Գրիգորյանը, և փոխարենը կառաջադրվի Ս. Խաչատրյանը: Հ. Գրիգորյանը, հիշեցնենք, եղել է Ս. Խաչատրյանի որդու ուսուցիչը և պատգամավոր է դարձել նրա շնորհիվ:
Որոշ տեղեկությունների համաձայն, սակայն, Սերժ Սարգսյանն առայժմ մտադիր չէ, Ս. Խաչատրյանին պաշտոն տալ, առավել ևս՝ Սյունիքի թիվ 37 կամ 38 ընտրատարածքներից որպես մեծամասնական ընտրակարգով ընտրված պատգամավոր բերել Ազգային ժողով:
