Մեծ Բրիտանիայի վարչապետ Դևիդ Քեմերոնը կարծում է, որ ԵՄ-ն պետք է ձգվի Ատլանտիկայից մինչև Ուրալ: Այս մասին նա հայտարարել է Ղազախստանում՝ ելույթ ունենալով Նազարբաևի անվան համալսարանի ուսանողների առջև՝ գրում է The Guardian-ը:
«Մեծ Բրիտանիան մշտապես աջակցում է ԵՄ-ի ընդլայնմանը: Այն պետք է դառնա համագործակցության մեծ առևտրային կազմակերպություն, որը կձգվի Ատլանտիկայից մինչև Ուրալ: Մենք միշտ խրախուսում ենք այն երկրներին, որոնք ցանկանում են միանալ ԵՄ-ին»,- ասել է Քեմերոնը:
Նա նաև հայտարարել է, որ ԵՄ-ն պետք է դառնա ավելի ճկուն, բացի այդ՝ պետք է փոխել ընդհանուր դրամական միավորը:
«Այնուհետև ԵՄ-ն պետք է ավելի ճկուն դարձնել, որպեսզի նա կարողանա ներառել այնպիսի երկրների, ինչպիսին Մեծ Բրիտանիան է կամ այլ երկրներ, որոնք ցանկանում են համագործակցել առևտրի ոլորտում, սակայն չեն ցանկանում ունենալ մեկ ընդհանուր դրամական միավոր:
Այդ պատճառով էլ ես կողմ եմ հանդես եկել ԵՄ իրավունքների վերանայմանը մինչև 2017թ.: Ես ասել եմ, որ իմ վերընտրման դեպքում մինչև 2017թ.-ի վերջը կանցկացնեմ հանրաքվե, որպեսզի բրիտանացի ժողովուրդը ընտրության հնարավորություն ունենա՝ արդյոք նրանք ցանկանո՞ւմ են մնալ այդ կազմակերպությունում, որը մինչ այդ շատ փոփոխությունների կենթարկվի, թե՞ ցանկանում են դուրս գալ դրանից»,- ասել է Դևիդ Քեմերոնը:
