Ռիո դե Ժանեյրոյում նոր բախումներ են տեղի ունեցել ոստիկանների ու «Մարականա» մարզադաշտի մոտ անցկացված բողոքի ակցիայի մասնակիցների միջև: Նշենք, որ այդ մարզադաշտում կիրակի օրը Բրազիլիայի ֆուտբոլի հավաքականը 3:0 հաշվով Իսպանիային հաղթել էր Կոնֆեդերացիայի գավաթի եզրափակչում: Այս մասին հայտնում է BBC-ն:
Ցուցարարները ոստիկանների ուղղությամբ նետել են քարեր ու Մոլոտովյան կոկտեյլներ, իսկ ոստիկանությունն ի պատասխան՝ արցունքաբեր գազ է կիրառել:
Ֆուտբոլային մրցաշարն ուղեկցվել է զանգվածային բողոքի ակցիաներով՝ ուղղված կոռուպցիայի, սոցիալական ծառայությունների ցածր որակի և 2014-ին Ռիոյում կայանալիք Ֆուտբոլի աշխարհի առաջնության նախապատրաստման մեծ ծախսերի դեմ:
Նշենք, որ Բրազիլիայի նախագահ Դիլմա Ռուսեֆը հրաժարվել էր մարզադաշտում եզրափակիչ խաղի դիտումից, քանի որ մեկ շաբաթ առաջ մրցաշարի բացման արարողության ժամանակ նրան ուղղված սուլոցներ էին հնչել:
