«Ազատ դեմոկրատներ» կուսակցությունն ի սկզբանե պաշտպանել և պաշտպանում է ԵՄ-ի հետ Ասոցացման համաձայնագրի ստորագրման գործընթացը՝ կարևորելով այդ գործընթացի ավարտական փուլը: Այս մասին այսօր «Առաջին լրատվական»-ի հետ զրույցում ասաց «Ազատ դեմոկրատներ» կուսակցության առաջնորդ, ՀՀ ԱԺ պատգամավոր Խաչատուր Քոքոբելյանը՝ անդրադառնալով Ասոցացման համաձայնագրի ստորագրմանը:
Նրա կարծիքով՝ այդ գործընթացը Հայաստանի կողմից ոչ թե պետք է լինի իմիտացիոն, այլ իրական գործընթաց, որի արդյունքում Հայաստանը պետք է դառնա եվրոպական ընտանիքի մի մաս, քանի որ ՀՀ-ն՝ ի դեմս իր քաղաքացիների, իրավունք ունի լինելու եվրոպական մեծ ընտանիքի անդամ: Քաղաքական գործչի համոզմամբ՝ ՀՀ-ն ԵՄ-ի հետ ստորագրելով Ասոցացման համաձայնագիրը՝ կստանա մեծ հնարավորություններ ինչպես տնտեսական, այնպես էլ քաղաքական և անվտանգության ոլորտներում: Խաչատուր Քոքոբելյանի խոսքով՝ ՀՀ-ի ապագան կապված է Եվրոպայի հետ և ոչ թե Միջին Ասիայի:
«Եթե կան անձինք, ովքեր հակառակն են կարծում, ուրեմն քաջատեղյակ չեն ներկայիս քաղաքական և տնտեսական գործընթացներից կամ ուղղակի ցանկություն չունեն տեսնելու այդ իրողությունները: Կարծում եմ, որ ՀՀ զարգացման համար պայմանագիրն անհրաժեշտ պայման է: Հուսանք, որ ՀՀ քաղաքացիներն ու ՀՀ իշխանություններն ի զորու կլինեն դիմակայելու բոլոր տիպի ճնշումներին և այդքան բախտորոշ հարցում չեն ցուցաբերի մակերեսային մոտեցում»,- նման տեսակետ հայտնեց Խաչատուր Քոքոբելյանը:
Վերջինս չի բացառում, որ ՀՀ ռազմավարական դաշնակիցը՝ ՌԴ-ն, կարող է դեմ լինել այս համաձայնագրի ստորագրմանը, ուստի այդ խնդիրը պետք է լուծել առանց այլոց շահերը հաշվի առնելու:
«Այսօր ինձ համար ցավալի է, որ ՌԴ-ն, լինելով ՀՀ ռազմավարական հիմնական գործընկերը, ՀՀ հակառակորդ երկրին՝ Ադրբեջանին, վաճառում է զինատեսակներ, որոնք ոչ թե պաշտպանողական են, այլ զուտ հարձակողական: Ցավում եմ, որ այդտեղ նույնպես հավասարակշռությունը չի պահպանվում»,- ասաց Խաչատուր Քոքոբելյանը:
Հիշեցնենք, որ «Ազատություն» ռադիոկայանի հետ հարցազրույցում Հայաստանում Եվրամիության պատվիրակության ղեկավար, դեսպան Թրայան Հրիսթեան ասել էր, որ Եվրամիության ու Հայաստանի միջև Ասոցացման համաձայնագրի բոլոր կետերի շուրջ բանակցությունները գրեթե ավարտված են և մնացել են միայն տեխնիկական բնույթի հարցեր: Գալիք նոյեմբերին Վիլնյուսում կայանալու է Եվրամիության ղեկավարության ու Եվրամիության Արևելյան գործընկերության ծրագրում ընդգրկված երկրների ղեկավարների գագաթնաժողովը, որի ժամանակ էլ ՀՀ-ն ու ԵՄ-ն նախատեսում են նախաստորագրել Ասոցացման համաձայնագիրն ու Ազատ առևտրի գոտու ստեղծման մասին պայմանագիրը:
Լուսանկարը՝ Photolure-ի
