Աճուրդի են դրվել Մոնիկա Լևինսկու ներքնազգեստը, հագուստները և այլ անձնական իրեր՝ հաղորդում է The Daily Mail-ը: Վաճառքով զբաղվում է Nate D. Sanders աճուրդի տունը: Թերթը հիշեցնում է, որ Լևինսկին ամբողջ աշխարհում մեծ ճանաչում ձեռք բերեց շնորհիվ ԱՄՆ նախկին նախագահ Բիլ Քլինթոնի հետ ունեցած սիրավեպի:
Պարբերականը նշում է նաև, որ մինչ Բիլ Քլինթոնը՝ Լևինսկին հարաբերություններ է ունեցել դրամատիկական արվեստի դասախոս Էնդի Բլեյերի հետ, որն ամուսնացած է եղել: Նա մասնակցել է հետաքննությանը և ԱՄՆ իրավապահ մարմիններին հաղորդել է Լևինսկու հետ ունեցած իր երկարատև սիրավեպի մասին:
Հայտնի չէ, թե ինչ պատճառներով են Բլեյերն ու կինն ամուսնալուծվել, սակայն ապահարզանից հետո դասախոսի նախկին կնոջ՝ Քեթի Բլեյերի մոտ մնացել է հագուստի և նվերների մի ամբողջ հավաքածու, որոնք Մոնիկան ուղարկել է նրանց: Քեթին այդ իրերը փոխանցել է երրորդ կողմին, որը դրանք աճուրդի է հանել:
Իրերի թվում են Լևինսկու ներքնազգեստը, Քլինթոնի երկու լուսանկար՝ ստորագրությամբ, Քլինթոնի կողմից շնորհավորական բացիկը՝ Բլեյերի ծննդյան օրվա կապակցությամբ և այլն:
Աճուրդի տունը ենթադրում է, որ հավաքածուի վերջնական գինը կկազմի 250-500 հազար դոլար:
