Արդեն վեցերորդ անգամ անցկացվող «ԴիջիԹեք» ամենամյա բիզնես-ֆորումի նպատակը դաշտի բացը լրացնելն ու բիզնեսում տեխնոլոգիաների կիրառումն է:
«Տեխնոլոգիաների կիրառման առումով Հայաստանը 5 տարի առաջ 116-րդ տեղում էր, իսկ այժմ 82-րդ տեղում ենք, սակայն դա էլ մեզ պատիվ չի բերում»,- այսօր լրագրողների հետ հանդիպմանը ասաց Ինֆորմացիոն տեխնոլոգիաների ձեռնարկություննների միության (ԻՏՁՄ) գործադիր տնօրեն Կարեն Վարդանյանը։
Բանախոսի պնդմամբ՝ ֆորումի շրջանակներում ստեղծվել են բազմաթիվ գործարար կապեր, ինչը կնպաստի դաշտի բարելավմանը:
«Մեր նպատակը միջավայր ստեղծելն է»,-ասում է Կ. Վարդանյանն ու հավելում, որ ֆորումի նպատակը բիզնես-միջավայրի և ՏՏ ոլորտի «հանդիպումը» կազմակերպելն է:
«ՏՏ ոլորտը հաճախ չի կարողանում ճիշտ ներկայացնել այն խնդիրները, որ ինքը կարող է լուծել, քանի որ չի առնչվում այդ խնդիրներին, իսկ բիզնես-ոլորտը չի կարողանում ճիշտ ձևակերպել պատվերը: Այս պարագայում առաջանում է թարգմանչի կարիք, ինչը թույլ է տալիս այս երկու կողմերի հանդիպումը»,- ասում է բանախոսն ու նշում, որ «ԴիջիԹեք»-ի խնդիրը ՏՏ բիզնես-ոլորտների շփման համար բարենպաստ միջավայր ստեղծելն է:
Այս տարվա «ԴիջիԹեք»-ին ներկայացվել են Սինգապուրի տեխնոլոգիական զարգացման փորձը, վանչուրային կապիտալի ներդրման առավելությունները, ներկայացվել են տեխնոպարկերի ստեղծման առավելությունները: Շուրջ քառասուն տեխնոլոգիական ներկայացումներ են եղել: Ցուցահանդեսին ներկա էին ավելի քան 40 տեղական և 12 արտասահմանյան կազմակերպությունների ներկայացուցիչներ՝ աշխարհի 8 երկրներից:
Առցանց տաքսի համակարգ, միջքաղաքային տրանսպորտի էլեկտրոնային չվացուցակ, ջերմոցային տնտեսությունների զարգացման համակարգ, անօդաչու թռչող սարքեր. սրանք ֆորումին ներկայացված նմուշների միայն մի փոքր մասն են:
Լուսանկարը՝ PanARMENIAN Photo-ի
