Թուրքիայում երկու շաբաթ է՝ շարունակվում են ցույցերը՝ ի պաշտպանություն Գեզի այգու, որտեղ ցանկանում են ծառահատումներ իրականացնել և կառուցել առևտրի կենտրոն:
«Առաջին լրատվական»-ի թղթակիցը հայտնեց, որ ի պաշտպանություն այգու՝ 200 հայ է միացել: «Նոր զարթոնք» նախաձեռնության անդամներից մեկը «Առաջին լրատվական»-ի հետ զրույցում նշեց, որ չնայած ոստիկանության բռնություններին, իրենք մասնակցում են ակցիաներին:
«Այստեղ հայ, քուրդ կամ թուրք լինելը կապ չունի, Գեզի այգին պաշտպանելը կապ ունի ստամբուլցի լինելու հետ, մեր իրավունքների պաշտպանության հետ»,- ասաց «Նոր զարթոնք» նախաձեռնության անդամներից մեկը՝ նշելով, որ այսօր պուրակի համար պայքարում են հանուն իրենց իրավունքների: Նա ասաց, որ Սուրբ Հակոբ գերեզմանատան համար հուշարձան են բացել, որով շատերն են հետաքրքրվել:
Նրա խոսքով՝ այստեղ են հավաքվել հայեր, թուրքեր, քրդեր, աջեր, ձախեր, համասեռամոլներ. «Շատ մեծ խառնուրդ ենք այստեղ, 14 -րդ օրն է՝ այստեղ ենք, Մուսա լեռան վրա 40 օր տևեց պայքարը, Գեզի այգու համար 14 օր է՝ պայքարում ենք»:
Նա նշեց, որ, դժբախտաբար, Թուրքիայի մեդիան խայտառակ եղավ այս շրջանում. մինչ Ստամբուլում վայրագություններ էին, մարդիկ էին մահանում, հեռուստատեսությամբ այլ բան էին հաղորդում: Մարդիկ սոցցանցերի, հատկապես «Ֆեյսբուքի» և «Թվիթերի» միջոցով էին տեղեկանում, թե իրականում ինչ է կատարվում: Նա նշեց, որ վարչապետ Էրդողանը դեռ շարունակում է կոպիտ «լեզվով» խոսել:
«Այս այգում մենք այլընտրանքային կյանք կառուցեցինք՝ հավասարության պայքարի մի փոքր աշխարհ: Բոլոր քաղաքներին, երկրներին էլ մաղթում ենք նույնը»,- ասաց նա:
