Հունաստանի խորհրդարանը կողմ է քվեարկել ժողովրդականություն չվայելող օրինագծին, որը նախատեսում է կենսաթոշակային բարեփոխման անցկացում և հարկերի բարձրացում։ Այս մասին հայտնում է BBC-ն։
Օրինագիծը, որն անհրաժեշտ է միջազգային ֆինանսական օգնության ստացման համար, արդեն քննարկման փուլում բողոքի ալիք է բարձրացրել շատ հույների շրջանում։ Երկու օրերի ընթացքում երկրում անցկացվել են համընդհանուր գործադուլներ, չի աշխատել հասարակական տրանսպորտը։
Բարեփոխումը նախատեսում է մի քանի կենսաթոշակային վճարների կրճատում, մի քանի կենսաթոշակային հիմնադրամների միաձուլում, միջին և բարձր եկամուտ ունեցողների նկատմամբ հարկերի բարձրացում։
Ներկայում Հունաստանը չի կարող ստանալ 5 մլրդ եվրոյի չափով ֆինանսական օգնության հերթական տրանշը, քանի որ դրա ստացման պայմաններից մեկը կենսաթոշակային ծախսերի կրճատումն է։
Այսօր կանցկացվի եվրոխմբի երկրների ներկայացուցիչների հանդիպումը, մեծ ուշադրություն կդարձվի հունական պարտքային ճգնաժամին։
Խորհրդարանական քննարկումներն ուղեկցվել են Աթենքում և Սալոնիկում անցկացված ցույցերով։ Աթենքում ցուցարարները բախվել են ոստիկանների հետ, նրանց ուղղությամբ նետվել են մոլոտովյան կոկտեյլներ, վերջիններս էլ ցուցարարների դեմ արցունքաբեր գազ ու լուսաձայնային նռնակներ են կիրառել։
