Թուրքական Milliyet թերթի փոխանցմամբ՝ Թուրքիայի նախկին վարչապետներից Մեսութ Յըլմազը հարցաքննվել է 1997 թվականի փետրվարի 28-ին Թուրքիայում իրականացված հետմոդեռնիստական (թավշյա) հեղաշրջման գործով:
Թերթն ուշադրություն է հրավիրում այն հանգամանքի վրա, որ դա տեղի է ունեցել այդ հեղաշրջումից ավելի քան 19 տարի անց: Յըլմազը հանդես է եկել վկայի կարգավիճակով: Նա պատասխանել է հեղաշրջման ժամանակ կոալիցիոն կառավարության վրա զինվորականների գործադրած ճնշումների մասին հարցերին, որոնք հանգեցրել են Նեջմեթթին Էրբաքանի գլխավորած կառավարության հրաժարականին:
Յըլմազն ընդգծել է, որ տեղյակ չի եղել ճնշումների մասին՝ նշելով, որ իր կառավարության վրա, որը հաջորդել է Էրբաքանի կառավարությանը, չեն եղել ճնշումներ:
Հիշեցնենք, որ Մեսութ Յըլմազը մոտ երկու տարում երեք անգամ դարձել է Թուրքիայի վարչապետ՝ 1991 և 1996 թվականներին (մի քանի ամսով) և 1997-1999 թվականներին:
Ի դեպ, հետմոդեռնիստական հեղաշրջման գործով դատավարություն անցկացնելը Թուրքիայում (և ոչ միայն) մեկնաբանվում է նաև որպես ներկայիս նախագահ Ռեջեփ Էրդողանի անձնական վրեժ, քանի որ այդ հեղաշրջումից հետո նա մի քանի ամսով հայտնվեց բանտում:
