Ռուսական RIA Novosti լրատվական գործակալության փոխանցմամբ՝ միգրացիոն ճգնաժամի լուծման հարցով ԵՄ-ի ու Թուրքիայի միջև համաձայնագրի նախագիծը դեռ լրամշակման կարիք ունի։ Այս մասին հայտարարել է Եվրոպական խորհրդի նախագահ Դոնալդ Տուսկը։
Նա ընդգծել է, որ առաջիկա օրերին անհրաժեշտ է լուծել խնդրահարույց մի շարք հարցեր՝ ստանալու համար ԵՄ անդամ բոլոր երկրների ու եվրոպական ինստիտուտների համաձայնությունը. «Նախորդ շաբաթ ինձ տվեցին միգրացիոն ճգնաժամի հարցով ԵՄ-ի ու Թուրքիայի միջև համագործակցության միջև համաձայնագրի նախապատրաստման մանդատ։ Ես աշխատում եմ մանրամասների վրա, ինչի համար էլ ես այստեղ եմ՝ Նիկոսիայում, և այսօր երեկոյան կմեկնեմ Անկարա։ Նպատակն այս շաբաթ բանակցություններն ավարտելն է, սակայն մենք դեռ չենք հասել դրան։
Պետք է լուծել օրինականության առանցքային հարցը։ Մենք պետք է ապահովենք, որ Հունաստանի ու Թուրքիայի միջև ներգաղթյալների վերադարձման յուրաքանչյուր նոր սխեմա ամբողջովին համապատասխանի ԵՄ օրենքներին ու մեր միջազգային պարտավորություններին»։
