Ժնևում այսօր կսկսվի Սիրիայի հարցով խաղաղ բանակցությունների երկրորդ ռաունդը: Կիրակի Ժնև են ժամանել և կառավարության, և ընդդիմության պատվիրակությունները՝ հայտնում է TASS-ը: Եվ հենց առաջին հայտարարություններն էլ ցույց են տվել, որ քննարկումներում գլխավոր խոչընդոտը կլինի Սիրիայի նախագահ Բաշար Ասադի ճակատագիրը:
Առաջին փուլի ավարտից հետո 1 ամսվա ընթացում Սիրիայում շատ կարևոր իրադարձություններ են տեղի ունեցել, ինչը թույլ է տվել ՄԱԿ-ի պատվիրակին կրկին Ժնև հրավիրել քաղաքական գործընթացի մասնակիցներին: Փետրվարի 27-ին Սիրիայում, որտեղ 2011 թվականից ի վեր զոհվել է ավելի քան ¼ միլիոն մարդ, իսկ 11 միլիոնը լքել են իրենց տները, ուժի մեջ է մտել հրադադարի ռեժիմը, որը հիմք է տվել անցնելու բանակցությունների նոր փուլի: «Հաջողության շանսերը մեծ են: Որոշակիորեն բարձր, քան երբևէ»,- ասել է դե Միստուրան շաբաթ օրը:
Սպասվող բանակցությունների, որոնք կտևեն մինչև մարտի 24-ը, հիմնական օրակարգը կլինի «Սիրիայի նոր կառավարումը, Սահմանադրությունը և սպասվող նախագահական և խորհրդարանական ընտրությունները՝ 18 ամսվա ընթացքում»: Սակայն մի բան ակնհայտ է. հակառակ ճամբարների սիրիացիների համար ամենամեծ խոչընդոտը կլինի նախագահ Բաշար Ասադի ճակատագրի հարցը:
