Ինչպես գրում է The Australian պարբերականը, «Ջեյմս Բոնդ 23» 007 գործակալի մասին հերթական ֆիլմի բյուջեի մոտ մեկ երրորդը կհամալրվի «թաքնված գովազդի» շնորհիվ, որոնք կվճարեն աշխարհահռչակ բրենդերի սեփականատերերը: Այն ընկերությունները, որոնք կցանկանան, որպեսզի իրենց ապրանքանիշերը երևան ֆիլմում, կվճարեն 45 միլիոն դոլար: Դա երկու անգամ ավելի է, քան նախորդ` Սթիվեն Սպիլբերգի «Փոքրամասնության զեկույց» ֆիլմում, երբ Lexus, Bulgari և American Express ընկերությունները վճարել էին 20 մլն դոլար:
Վերջին տարիների խոշորագույն պայմանագիրը ստորագրվել է 1995 թ.-ին BMW ընկերության հետ, երբ երեք ֆիլմերում 007 գործակալը ճամփորդում էր այդ մակնիշի մեքենայով: Շուտով ֆիլմի արտադրության և վաճառքի համար պատասխանատու MGM և Sony ընկերություններից աշխարհահռչակ ընկերություններին կուղարկվեն գովազդի «տեղադրման» առաջարկներ: Ակնկալվում է, որ «Ջեյմս Բոնդ 23» ֆիլմը կինորթատրոններ կիջնի 2012 թ. նոյեմբերին` այդ շարքի 50-ամյակի կապակցությամբ:
