Անկարայի արտաքին քաղաքական կուրսը վերջին տարիներին հանգեցրել է լուրջ խնդիրների մի շարք երկրների հետ հարաբերություններում, այդ թվում Իսրայելի, Իրաքի, Եգիպտոսի, Սիրիայի, Իրանի, Ռուսաստանի և ԱՄՆ-ի, գրում է թուրքական Radikal պարբերականը:
Ռուսաստանի հետ խնդիրները բացասական են ազդում և կազդեն եվրասիական տարածաշրջանի մի շարք երկրների հետ Անկարայի հարաբերությունների վրա, նշված է հոդվածում:
Այդ ճգնաժամը կարող էր ուրախացնել նրանց, ովքեր հույս ունեին Թուրքիայի հարաբերությունների ջերմացմանը ԵՄ և ՆԱՏՕ-ի հետ, սակայն այդ սպասելիքները չարդարացան: «Լյուքսեմբուրգի ԱԳ նախարարի խոսքերը այն մասին, որ ռուս-թուրքական լարվածության սրման դեպքում ՆԱՏՕ-ն անհամբերությամբ չի սպասում Ռուսաստանի հետ հակամարտության մեջ մտնելուն, ստիպում է երկնքից իջնել գետnին»,- գրում է պարբերականը:
Դրանով Թուրքիայի արտաքին քաղաքական խնդիրները չեն սահմանափակվում: Պարզ չէ, թե ինչպիսին կլինի Անկարայի հարաբերությունները Դամասկոսի նոր կառավարության հետ Սիրիայում ընտրություններից հետո: Դրան ավելանում է Իրանի վերադարձը համաշխարհային ասպարեզ, քրդական հարցը և հարաբերությունները քրդական համայնքների հետ արտասահմանում:
«Դիլեմաները, որոնք կանգնած են Թուրքիայի առջև արտաքին քաղաքականության մեջ, աճում են ինչպես ձնագունդ»,- ամփոփում է Radikal-ը:
