Ծնողներից շատերն են հարդարում իրենց երեխաների մազերը, բայց ոչ բոլորն են հյուսում այսքան աներևակայելի ու խրթին հյուսքեր, ինչպես մելբուռնցի մայրիկ Շելլի Գիֆորդը: Այս մասին գրում է buzzfeed.com կայքը:
Չնայած Շելլին միշտ էլ սիրում էր հյուսել, նրա իրական տարվածությունը սկսվել է 2014 թ.-ի սկզբին, երբ սոցիալական ցանցում գտավ սանրվածքների նոր աշխարհ: Այժմ նրա վեցամյա դուստրը՝ Գրեյսը, ամեն օր դպրոց է հաճախում տարբեր ոճերով:
«Ես գտա էջեր, որոնք նախատեսված էին միայն ցուցադրելու համար այն սանրվածքները, որոնք մայրիկներն անում են իրենց դուստրերի համար: Ես հավանեցի այդ գաղափարը, ու հենց այդ ժամանակ էր, որ բացեցի Ֆեյսբուքի և Ինսթագրամի իմ էջերը»,- BuzzFeed Life կայքին պատմում է Շելլին: «Ես պարզապես սիրում եմ նոր ոճեր սովորել և զարգացնել հմտություններս: Ես տարված եմ վարսերով»:
Շելլին ամեն գիշեր հաջորդ առավոտվա համար նոր ոճ է մտածում: Դպրոց գնալու օրերին 15-20 րոպե հատկացվում է հյուսելուն: Ամենաբարդ սանրվածքները պահվում են հանգստյան օրերի համար: «Շատ մարդիկ հարցնում են՝ ինչպես եմ դստերս ստիպում այդքան երկար նստել: Գրեյսը հիասքանչ է. ես նրա մազերը հարդարել եմ՝ սկսած այն պահից, երբ նա նոր-նոր էր քայլել սովորում, դա սովորական է նրա համար»,- ասում է Շելլին:
Անշուշտ, Գրեյսի մազերը ինչպես առցանց տիրույթում, այնպես էլ դպրոցում ևս քննարկման առարկա են դարձել:
Չնայած Շելլին չունի նախընտրելի սանրվածք, սակայն նրան դուր է գալիս տեսնել, թե ինչպես են իր հետևորդները հաճախ կրկնօրինակում իր սանրվածքները: Եվ պարզ է, թե ինչու. դրանք կախարդական են: Ամենքն էլ խոնարհվում են «Հյուսքերի թագուհու»՝ Շելլիի առաջ:
