Գազի գնի թանկացումը ձեռնտու էր միայն ՀՀ կառավարությանը: Այսօր լրագրողների հետ հանդիպման ժամանակ այս մասին ասաց ՀՀ նախագահի նախկին թեկնածու, քաղաքագետ, իրավաբան Անդրիաս Ղուկասյանը՝ անդրադառնալով գազի գնի թանկացմանն ու դրա պատճառների մասին շրջանառվող վարկածներին:
Բանախոսի խոսքով՝ կարծես բոլորը մոռացել են, որ Հայաստանը գազը Թուրքմենիայից էր ներկրում: Այդ տարիներին, ըստ նրա, որևէ մեկը գազի գին հասկացողություն ոչ լսել էր, ոչ էլ այդ մասին խոսում էր, թեև այդ տարիներին ևս դա խնդիր էր հանրության համար: Ավելին՝ թեպետ շատ դժվար տարիներ էին, այդ հարցում քաղաքական բաղադրիչ չէին տեսնում: Սակայն 2000-ական թթ., նրա խոսքով, տեսնում ենք, որ դա դարձավ լուրջ քաղաքական խնդիր՝ այն դեպքում, երբ Ռուսաստանը սկսեց վաճառել այդ գազը:
«Այս հարցի շուրջ մենք պարբերաբար տարբեր հարցադրումներ ենք ունենում, բայց պետք է հասկանալ, թե ով է բոլորից շահագրգռված, որ գների բարձրացում տեղի ունենա Հայաստանում: Իմ համոզմամբ՝ ամենաառաջին շահագրգիռ կողմը ՀՀ կառավարությունն է, որովհետև Հայաստանում ամենախոշոր հարկատուն ժողովուրդն է, ժողովուրդն է 20 տոկոս ԱԱՀ վճարում. ժողովուրդը որքան բարձր գին վճարի այս կամ այն ծառայության, ապրանքի համար, այնքան բյուջեն մեծ կլինի:
«Գների բարձրացման քաղաքականությունը կառավարության շահերը սպասարկող քաղաքականություն է: Շուտով առանց որակական փոփոխությունների կզեկուցեն, որ տեղի են ունեցել տնտեսական ինդիկատորների փոփոխություններ, որ աճ կա: Բայց, բնականաբար, հասկանում ենք, որ ամբողջ տնտեսությունը մեկուկես, երկու անգամ բարձրացնում է գները, տնտեսության ֆորմատն է փոխվում, և սա, իհարկե, լուրջ մարտահրավեր է հանրության համար»,- մեկնաբանեց Անդրիաս Ղուկասյանը:
Նա հավելեց՝ եթե հանրությունն ի վիճակի չլինի պաշտպանվել, մենք կորցնելու ենք մեր երկրի ազգային անվտանգության ևս մեկ բաղադրիչ: Նրա խոսքով՝ երկրի ուժը բանակն է, ազգն ու պետությունը. եթե այդ երեք կատեգորիաների մեջ չկա համադրություն, պաշտպանվելու համար երկիրն իրական ուժ չի ունենա:
Անդրիաս Ղուկասյանի համոզմամբ՝ մինչդեռ այսօր պետությունն ու ազգը գտնվում են հակադիր դիրքերում՝ պետությունը մարդկանց հաշվին իր խնդիրներն է լուծում, իսկ դա հայ ժողովրդին ոչնչացման եզրին է հասցնում:
Ուստի, նրա կարծիքով, մինչև ժողովուրդը չվերադարձնի քաղաքական իշխանությունը, որը պատկանում է իրեն, մենք ունենալու ենք տնտեսություն, որը գործելու է ինքն իր համար:
«Նման անարդար համակարգերը վերացվում են հեղափոխությունների միջոցով: Մեր հանրությունը կանգնած է խռովության առաջ. եթե քաղաքական ուժերն ադեկվատ լուծումներ չտան, սոցիալական բախումն անխուսափելի է»,- ասաց Անդրիաս Ղուկասյանը:
