Հունաստանը զգուշացրել է, որ չի վերածվի «հոգիների շտեմարանի» այն բանից հետո, երբ տասնյակ հազարավոր փախստականներ Եվրոպայի կողմից երկրում հայտնվել են ծուղակում: Այս մասին հայտնում է dailymail.co.uk-ն:
Երկու հուսահատ մարդ հինգշաբթի փորձել են իրենց կախել Աթենքի հրապարակի կենտրոնում, երբ նրանց հիասթափությունը աճել է փակ սահմանների պատճառով, ինչի հետևանքով նրանք չեն կարողանում դուրս գալ երկրից:
Իսկ պակիստանցի տղամարդուն անգիտակից վիճակում տեղափոխել են հիվանդանոց այն բանից հետո, երբ նա իրեն կախել է ծառից:
Հույն պաշտոնյաների գնահատմամբ՝ 20 հազար փախստական կուտակվել են սահմանին այն բանից հետո, երբ հարևան Մակեդոնիան երկուշաբթի օրը կտրուկ փակել է սահմանը բոլորի համար՝ բացառությամբ Իրաքից և Սիրիայից փախստականների:
Ներգաղթյալների բոլոր կենտրոնները լեփ-լեցուն են, ուստի Հունաստանի իշխանությունները որպես ժամանակավոր կացարաններ սկսել են օգտագործել մարզադաշտերը:
ՄԱԿ-ի փախստականների գործակալությունը հինգշաբթի հայտարարել է, որ իրենք մտադիր են վարձակալել ամբողջ հյուրանոցներ հարյուրավոր սենյակներով` նվազագույնը 9 ամսով:
Հունաստանի վարչապետը նախազգուշացրել է, որ իր երկիրը կարգելափակի ապագա ԵՄ համաձայնությունները, եթե նրա մյուս անդամները մերժեն կիսելու իրենց փախստականների բեռը:
