Կաննի կինոփառատոնում բացվել է «Հատուկ հայացք» մրցութային ծրագիրը: Ինչպես տեղեկացնում է RIA Novosti-ն, փառատոնը բացել է անկախ ռեժիսոր Սոֆյա Կոպոլայի «Էլիտար հասարակություն» (The Bling Ring) ֆիլմը:
«Հատուկ հայացք» մրցութային ծրագրի ժյուրիի նախագահն է դանիացի ռեժիսոր Թոմաս Վինտերբերգը:
Այս տարի ժյուրիի կազմում են չինացի դերասանուհի Չժան Զզինը, ֆրանսիացի դերասանուհի Լյուդվին Սանիեն, Ռիո դե Ժանեյրոյի կինոփառատոնի տնօրեն Իլդա Սանտյագոն և իսպանացի պրոդյուսեր Էնրիկե Գոնսալես Մաչոն: Նրանք պետք է գնահատեն 18 ֆիլմ:
«Էլիտար հասարակություն» ֆիլմը «Հատուկ հայացք»-ում ներկայացնելու համար բեմ են դուրս եկել դերասան Իսրայել Բրուսարն ու դերասանուհի Քեթի Չանգը, Կլեր Քլիս Ժյուլյենը, Թաիսիա Ֆարմիգան ու Էմմա Ուոթսոնը:
Ինչպես ավելի վաղ հայտարարել էր Կաննի կինոփառատոնի գործադիր տնօրեն Տիերի Ֆրեմոն, «Հատուկ հայացք»-ի ծրագիրը նվիրված է այն ժապավեններին, որոնց թեման ու կատարումն աչքի են ընկնում բացառիկությամբ:
