ՀՀ տրանսպորտի և կապի նախարար Գագիկ Բեգլարյանը փետրվարի 16-ին հանդիպել է Հայաստանի Հանրապետությունում Վրաստանի արտակարգ և լիազոր դեսպան Թենգիզ Շարմանաշվիլիին: Վրացի դիվանագետն ավարտում է իր 5-ամյա դիվանագիտական առաքելությունը մեր երկրում:
Ինչպես տեղեկացրին ՀՀ տրանսպորտի և կապի նախարարության լրատվական ծառայությունից, Գագիկ Բեգլարյանը ողջունել է հյուրին և շնորհակալություն հայտնել նախարարության հետ դեսպանատան սերտ աշխատանքի համար: Նախարարը նկատել է, որ կապի և տրանսպորտի ոլորտում հայ-վրացակյան գործակցությունը վերջին 5 տարիներին նոր մակարդակի է բարձրացել: Գագիկ Բեգլարյանը կարևորել է դեսպանի մեծ ներդրումը երկու երկրների պետական սահմանին՝ Բագրատաշեն-Սադախլո անցման կետի տարածքում, Բարեկամության կամրջի կառուցման վերաբերյալ համաձայնագրի ստորագրման գործում: Դեբետ գետի վրա կամուրջ կառուցելու մասին համաձայնագիրը ստորագրվել է 2014թ.-ին Երևանում՝ Հայաստանի Հանրապետության և Վրաստանի կառավարությունների միջև:
Մեր երկրում դիվանագիտական առաքելությունն ավարտող Վրաստանի արտակարգ և լիազոր դեսպան Թենգիզ Շարմանաշվիլին նշել է, որ իր` դեսպան աշխատելու ընթացքում երկու երկրները համատեղ կատարել են մի շարք աշխատանքներ, հասել նշանակալի հաջողությունների տարբեր ոլորտներում, այդ թվում՝ կապի և տրանսպորտի ոլորտում: Դեսպան Շարմանաշվիլին ասել է, որ մեծ սիրով ու պատասխանատվությամբ է կատարել իր դիվանագիտական առաքելությունը, իսկ Երևանն իր համար վերջին 5 տարիներին հարազատ տան պես է դարձել:
Հանդիպման ավարտին նախարարը մեկ անգամ ևս շնորհակալություն է հայտնել վրացի դիվանագետին՝ մաղթելով հաջողություններ հետագա գործունեության ընթացքում:
