ԱՄՆ-ն Թուրքիային կոչ է արել դադարեցնել Սիրիայի տարածքում քրդերին հարվածներ հասցնել, հայտարարել է պետդեպարտամենտի պաշտոնական ներկայացուցիչ Մարկ Տոները:
«Մենք կոչ ենք անում Թուրքիային դադարեցնել սահմանի երկայնքով հրետանային հարվածները»,- ասել է Տոները ճեպազրույցում:
Միևնույն ժամանակ նա ավելացրել է, որ եթե հարվածները հասցվեին այդ շրջանում ԴԱԻՇ-ի զինյալներին, «դա կլիներ գերազանց»:
Ընդ որում, Տոները քրդերի գործողություններն անվանել է «հակակառուցողական» ԴԱԻՇ-ի դեմ ընդհանուր պայքարի համատեքստում` նկատի ունենալով այն, որ այդպիսի «լրացուցիչ տարածքներ» գրավելու գործողություններն առաջացնում են Թուրքիայի և արաբական ընդդիմադիր ուժերի մտահոգությունը:
Հիշեցնենք, որ թուրքական հրետանին չորս օր շարունակ գնդակոծում է քրդական ինքնապաշտպանական ուժերի դիրքերը Մինեհ ավիաբազայում և մոտակա տարածքներում:
