Կանանց իմունային համակարգը, տղամարդկանց համեմատ, երկար է «երիտասարդ» մնում, ու դրանով կարելի է բացատրել կանանց երկարակեցությունը, կարծում են ճապոնացի գիտնականները, որոնց աշխատանքը հրապարակված է Immunity & Ageing ամսագրում:
Հետազոտողներն ուսումնասիրել են ճապոնացի 20-90 տարեկան առողջ բնակիչների արյան նմուշներն ու պարզել, որ արյան մեջ լեյկոցիտների ընդհանուր թիվը ժամանակի ընթացքում նվազում է, սակայն լիմֆոցիտների ցուցանիշը, որը նվազման միտում է դրսևորում տղամարդկանց շրջանում, կանանց մոտ տարիքի հետ բարձր է մնում:
Հեղինակները նշում են, որ այդ ցուցանիշը կարելի է նորմալ համարել, քանի որ երիտասարդ տարիքում տղամարդկանց մոտ լիմֆոցիտների քանակն ավելի շատ է, քան կանանց մոտ:
Պարզվել է, որ լիմֆոցիտների որոշակի տեսակներ կանանց մոտ ավելի դանդաղ են նվազում, քան տղամարդկանց մոտ:
«Ծերացման գործընթացը տղամարդկանց ու կանանց մոտ տարբեր է շատ պատճառներով: Կանանց օրգանիզմում ավելի շատ էստրոգեն հորմոն կա, որն, ամենայն հավանականությամբ, պաշտպանում է նրանց սրտանոթային հիվանդություններից մինչ դաշտանադադարի սկսվելը: Սեռական հորմոններն ազդում են նաև իմունային համակարգի վրա, հատկապես լիմֆոցիտների տեսակի ձևավորման վրա»,- ասում է Տոկիոյի բժշկա-ատամնաբուժական համալսարանի պրոֆեսոր Կացուիկի Հիրոկավան:
