Ատոմային էներգիայի միջազգային գործակալության աշխատակիցները ժամանել են Ավստրիայում Իրանի դեսպանատուն՝ Իրանի ներկայացուցիչների հետ երկրի միջուկային ծրագրի հարցերով խորհրդակցություններ անցկացնելու:
Բանակցություններին մասնակցող ԱԷՄԳ-ի գլխավոր տնօրենի անվտանգության հարցերով տեղակալ Հերման Նակարտսի խոսքով՝ ԱԷՄԳ-ը տրամադրված է շարունակել Իրանի հետ երկխոսությունը՝ միջուկային ծրագրի հարցի շուրջ տարաձայնությունները կարգավորելու համար:
«Մեր նպատակն է ավարտուն տեսքի բերել իրանական միջուկային ծրագրի հնարավոր ռազմական բնույթի սահմանմանն ուղղված կառուցվածքային մոտեցումների մասին փաստաթուղթը»,- ասել է նա:
«Տարաձայնությունները պահպանվում են, սակայն մենք տրամադրված ենք երկխոսության, որպեսզի այդ տարաձայնությունները հարթվեն: Լարված կաշխատենք այդ ուղղությամբ»,- հավելել է Նակարտսը խորհրդակցությունների մեկնարկից առաջ:
ITAR-TASS-ի աղբյուրը, որը մոտ է կողմերից մեկին, ավելի վաղ հայտնել էր, որ բանակցությունների ժամանակ խոսքը կրկին կվերաբերի փաստաթղթին, որը սահմանում է չափորոշիչները ՝ ուղղված Իրանի միջուկային օբյեկտներ միջազգային փորձագետների հնարավոր հասանելիությանը և վիճելի հարցերի պարզաբանմանը:
Խորհրդակցությունների 11-րդ ռաունդին երկու կողմերն էլ փնտրում են այն լեզուն, որն ընդունելի կլինի: Աղբյուրի փոխանցմամբ՝ կարևորը, որ այդ լեզուն տանի խնդրահարույց գոտիների փակմանը, իրավիճակի պարզաբանմանը, ոչ թե նոր վիճելի պահերի առաջացմանը:
